Rus tilida shaxslararo muloqotni taqiqlash Ukrainaning barcha universitetlariga tatbiq etilishi kerak, dedi Ukrainadagi davlat tilini himoya qilish komissari Taras Kremen. Bu haqda “TASS” Ukrainaning “Rada” agentligiga tayanib, xabar berdi.
Kremen Kiyev-Mogila akademiyasida rus tilida gaplashish taqiqlangani haqida 27-yanvar kuni joriy etilgan qoidaga shunday izoh berdi.
“Men bu qarorni qo‘llab-quvvatlayman va har bir universitet Ukrainaning haqiqiy vatanparvar, irodali, bilimli fuqarolarini tarbiyalash uchun eng yaxshi imkoniyatlarni yaratishi kerak, deb hisoblayman”, — dedi Kremen.
Uning fikricha, ta’lim sohasi milliy manfaatlarni himoya qilish masalalarida namuna bo‘lishi kerak. Kremen ta’kidlaganidek, “Ukrain tilining davlat tili sifatida amal qilishini ta’minlash to‘g‘risida”gi Ukraina qonunining 21-moddasiga muvofiq o‘quv jarayonlari davlat tilida olib borilishi kerak.
2022-yil 21-oktabr kuni Ukraina Milliy xavfsizlik va mudofaa kengashi rahbari Aleksey Danilov Ukrainadan rus tili “butunlay yo‘q bo‘lib ketishi” kerakligini aytib, uni “dushmanlik propagandasining elementi” deb atagandi. 11-noyabr kuni Kiyevdagi bolalar bog‘chalari va maktablari o‘quv rejalaridan rus tili olib tashlandi. Bunday qaror shahar kengashi deputatlari tomonidan qabul qilingan.
Kremen aytayotgan qonun 2019-yilda kuchga kirgan. U boshqa tillarga nisbatan ukrain tiliga eksklyuziv huquqlar berdi va hayotning ko‘plab sohalarida undan foydalanishni nazorat qilish mexanizmlarini joriy etdi. Qonun, shuningdek, nodavlat tillar doirasini keskin qisqartirgan: milliy kanallardagi dasturlarning 90 foizi ukrain tilida efirga uzatilishi kerak, ommaviy axborot vositalarining faqat rus tilida ishlashi taqiqlangan — ularga ukrain tilidagi versiyani yuritish majburiy qilingan.
Izoh (0)