Eron Islom inqilobi qo‘riqchilari korpusi (EIIQK) Aerokosmik kuchlari raketaga qarshi mudofaa tizimi daxl qila olmaydigan, 1400 kilometrgacha ucha oladigan “Fattoh” deb nomlangan gipertovushli raketani taqdim etdi, deya xabar bermoqda Fars agentligi.
Eron Aerokosmik kuchlarining so‘nggi strategik yutug‘i bo‘lgan “Fattoh” gipertovushli raketasi prezident Ibrohim Raisiy va EIIQK bosh qo‘mondoni Husayn Salamiy ishtirokida taqdim etildi.
Qayd etilishicha, “Fattoh” qattiq yonilg‘ili dvigatelga ega bo‘lib, raketalarga qarshi barcha mudofaa tizimlarini yengib o‘tishga va ularga zarba berishga qodir.
Yangi raketaning uchish masofasi 1400 kilometr, tezligi esa soatiga 14-15 ming kilometrgacha.
Agentlik maʼlumotlariga ko‘ra, raketa yaxshi manyovrga egaligi va yuqori aniqligi bilan ajralib turadi. “Fattoh” atmosferada va undan tashqarida manyovr qila oladi, radar tizimlariga ko‘rinmaydi.
Izoh (0)