Xerson viloyatining Rossiyaga qo‘shib olingan qismida joylashgan Nova Kaxovka shahridagi Kaxovka GES to‘g‘onining vayron bo‘lishi oqibatida “Kazkova dibrova” hayvonot bog‘i suv ostida qoldi, deb xabar bermoqda “RBK-Ukraina” mahalliy Telegram kanallariga tayanib.
Nashrning yozishicha, hodisa oqibatida barcha hayvonlar nobud bo‘lgani taxmin qilinmoqda. Jurnalist Andrey Smolniy hayvonlarning bir qismi allaqachon o‘lgan bo‘lishi mumkinligini yozdi. “RBK-Ukraina” maʼlumotlariga ko‘ra, 2022-yil fevral holatiga ko‘ra hayvonot bog‘ida 260 ta jonivor boqilayotgandi.
Nova Kaxovkaning qonuniy meri Vladimir Kovalenko “Strana” nashriga bergan izohida hayvonot bog‘i birinchilardan bo‘lib suv ostida qolganini aytdi. “U yerdagi hayvonlarning taqdiri qanday kechganini aytish men uchun og‘ir. Chunki ruslar tunda u yerga xodimlarning kirishiga ruxsat bermagan. Ertalab kelgan xodimlar bog‘ga kira olmagan, chunki u yerni suv bosgandi”, — dedi Kovalenko.
Shahar meri, shuningdek, “Ukrainskaya pravda” nashriga hozirda aloqa bilan bog‘liq muammolar tufayli shahardan ma’lumot olish qiyinligini aytdi. U Rossiya nazoratidagi hududda odamlar axborot vakuumida qolishi uchun signal to‘sib qo‘yilgan bo‘lishi mumkinligini aytdi.
Kaxovka GES vayron bo‘ldi
6-iyun kuni erta tongda ijtimoiy tarmoqlarda Kaxovka GES to‘g‘oni vayron bo‘lgani, undan suv oqib chiqayotgani haqida xabarlar va videolar tarqaldi. Ukraina Qurolli kuchlarining “Janub” operativ qo‘mondonligi Rossiya qo‘shinlari gidroelektrstansiyasini “portlatib yuborganini” ma’lum qildi. Xerson viloyati maʼmuriyati rahbari Aleksandr Prokudin ham Rossiya tomoni GESni portlatganini maʼlum qildi. Rossiya tomonidan tayinlangan Novaya Kaxovka “meri” Vladimir Leontiyev avvaliga portlash haqidagi ma’lumotni rad etdi, biroq keyinroq “ma’muriyatdagilar” Ukraina tomonidan tungi o‘qqa tutishlar oqibatida GESning yuqori qismi vayron bo‘lgani, ammo to‘g‘on saqlanib qolgani haqida aytishdi.
“TASS” Rossiya favqulodda xizmatlariga tayanib xabar berishicha, 80 ta aholi punktini suv bosishi mumkin. Xerson viloyatining xavfli hududlaridan aholini evakuatsiya qilish boshlangan. Ijtimoiy tarmoqlarda Nova Kaxovka shahrini suv bosayotgani aks etgan videolar e’lon qilinmoqda.