Turkiyaning 500 kishidan iborat bataloni Kosovoga NATO missiyasining qo‘shimcha kuchlari sifatida yetib keldi. Bu haqda alyans saytida ma’lum qilindi.
“NATO qo‘shimcha kuchlari 2023-yil, 5-iyun dushanba kuni Kosovoga yetib kela boshladi. Qo‘shimcha kuchlarning asosiy qismini Turkiyaning 65-motoo‘qchi brigadasining 500 ga yaqin askari tashkil qiladi”, — deyiladi xabarda.
Ta’kidlanishicha, turk batalyoni dastlab Sulton Murat lageriga joylashtiriladi va qancha kerak bo‘lsa, shuncha vaqt Kosovoda qoladi. Shuningdek, NATO zaxira kuchlarining qo‘shimcha batalyoni ham zarurat tug‘ilganda foydalanish uchun yuqori shay holatga keltirilgan.
4-iyun kuni Turkiya prezidenti Rajab Toyyib Erdo‘g‘on bilan Istanbulda bo‘lib o‘tgan muzokaralardan so‘ng alyans bosh kotibi Yens Stoltenberg unga Kosovoga qo‘shimcha kuch yuborayotgani uchun minnatdorlik bildirgan.
3-iyun kun Turkiya NATOning Ittifoqchi birlashgan kuchlari qo‘mondonligi so‘roviga ko‘ra Kosovoga maxsus kuchlar batalyonini jo‘natayotgani ma’lum bo‘ldi. Ertasi kuni bu kuchlarni Kosovoga joylashtirish boshlangani xabar qilindi.
Avvalroq Stoltenberg alyansning 700 askardan iborat kuchlari allaqachon Kosovoga yetib borganini aytgandi. Uning qayd etishicha, bu chora mintaqadagi mojaroni tinch yo‘l bilan hal qilish yo‘lidan voz kechishni anglatmaydi.
May oyi oxirida Kosovo shimolida etnik serblarning norozilik namoyishi tartibsizlikka aylandi. Aholining xavfsizlik kuchlari bilan to‘qnashuvlari oqibatida 52 nafar serb va NATOning kamida 30 nafar harbiysi yaralangan.
Izoh (0)