Britaniyalik mudofaa bo‘yicha tahlilchi Maykl Klark Ukrainaning Kaxovka platinasi portlashiga aloqadorligini rad etdi va bu hujum faqat Rossiya uchun foydali ekanini ta’kidladi. Bu haqda u Sky News’ga bergan intervyusida fikr bildirdi.
Klarkning qayd etishicha, portlash Rossiya tomonida sodir bo‘lgan.
“To‘g‘onga qilingan hujum ortida Ukraina turganiga ishonish qiyin, chunki u bu bilan hech narsaga erisha olmaydi. Shunday bo‘lgan taqdirda ham portlash to‘g‘onning Rossiya tomonida yuz berganini eslash kerak”, — deydi tahlilchi.
Shuningdek, u Dneprdagi suv sathining yuqoriligi Ukraina Qurolli kuchlarining qarshi hujum vaqtida daryodan o‘tishiga to‘sqinlik qilishi mumkinligini ham prognoz qildi.
“Bu Qrim va Qrimda yashovchi ruslar uchun yomon bo‘lsa-da, shubhasiz, Ukrainadan ko‘ra ko‘proq Rossiya tomonidan sodir etilgan deb o‘ylayman. Ukraina bundan hech qanaqasiga manfaatdor emas, Rossiyaga esa ko‘p foydasi bor”, — deya qo‘shimcha qildi u.
Kaxovka GESning vayron bo‘lishi; Ukrainada qanday dalillar bor?
6-iyunga o‘tar kechasi Xerson viloyatidagi Kaxovskaya GESi portlatildi. Ukraina va Rossiya hodisada bir-birini ayblamoqda hamda bir-biriga qo‘yilgan ayblovlarni rad etmoqda. Stansiya butunlay vayron bo‘lgan, ayrim hududlarda suv sathi o‘ta og‘ir, 80 ga yaqin aholi punkti suv bosish xavfi ostida.
Ukraina janubi mudofaa kuchlarining Birlashgan muvofiqlashtiruvchi matbuot markazi rahbari Natalya Gumenyukning so‘zlariga ko‘ra, bosqinchilar shu yo‘l bilan Ukraina Qurolli kuchlari qarshi hujumining oldini olmoqchi bo‘lgan.
Uning aniqlik kiritishicha, dushman shoshilinch qadam tashlagan va endi uning o‘zi suv bosgan hududlardan qanday qochishni bilmayapti. Rossiya oldindan GESga zarba berishga tayyorgarlik ko‘rgani ta’kidlangan.
O‘z navbatida, Ukraina razvedkasi (GUR) rahbari Andrey Yusovning aytishicha, Ukrainada Rossiya stansiyani qanday portlatganiga oid dalillar bor. Xususan, dushman GES to‘g‘onini masofadan turib portlatib yuborgan.
Izoh (0)