Украина президенти Владимир Зеленскийнинг маълум қилишича, альянс аъзолари Украинанинг НАТОга аъзо бўлиш масаласини орқага сургани сабабли мамлакатнинг умиди сўниб бормоқда. Унга кўра, кузгача Киевга номзод мақомини олиш бўйича “аниқ ижобий қарор” керак.
“Украиналиклар Европа Иттифоқи ва НАТОга қўшилиш борасида аниқ ижобий жавобни кўрмаяпти. Ва бизнинг умидларимиз тобора сўниб бормоқда.
Афсуски, ҳафсаламиз пир бўлаётганини бу ерда изҳор этишга мажбурман”, — деди Украина президенти Молдовада бўлиб ўтаётган Европа сиёсий ҳамжамиятининг саммитида.
Владимир Зеленский 2022 йил 30 сентябрда мамлакатнинг НАТОга тезлаштирилган аъзолиги учун ариза топширган. Шимолий Атлантика альянси бош котиби Енс Столтенберг, агар ариза маъқулланса, НАТО ўз уставининг бешинчи моддасига мурожаат қилиши кераклигини бир неча бор тушунтирди: НАТОга аъзо давлатга ҳужум қилинса, альянснинг барча аъзоларидан жавоб талаб қилинади. Альянс қоидаларига кўра, тугалланмаган ҳудудий можароси бўлган мамлакатни қабул қилишга рухсат берилмайди.
Шу билан бирга, Владимир Зеленский май ойида Украина Россия билан ҳарбий можаро тугамагунча НАТОга қўшила олмаслигини тан олди. Бироқ, унинг сўзларига кўра, ҳарбий ҳаракатлар тугаганидан кейин иттифоққа қўшилиш учун мамлакатга кафолатлар керак.
Изоҳ (0)