Ukraina Qurolli kuchlari quruqlikdagi qo‘shinlari qo‘mondoni Aleksandr Sirskiy qo‘mondonlik qarori bilan Baxmut yo‘nalishi qanotlari bo‘ylab yurish to‘xtatilganini ma’lum qildi.
Janob Sirskiyning so‘zlariga ko‘ra, hozir Ukraina tomoni o‘z bo‘linmalarining jangovar qobiliyatini tiklashga e’tibor qaratgan.
“So‘nggi bir necha kun ichida qanotlarda oldinga siljish to‘xtatildi, chunki u yerda boshqa muhim vazifalar bajarildi. Guruhimiz qo‘mondonligi bo‘linmalarimizning jangovar qobiliyatini tiklash va dushman niyatlarini buzishga qaratilgan tegishli choralarni ko‘rmoqda”, — dedi u “Ukrainskaya pravda” gazetasiga bergan intervyusida.
Aleksandr Sirskiyning so‘zlariga ko‘ra, Baxmutda o‘tkazilgan “operatsiya formati” “Vagner” bo‘linmalari olib chiqilib, ularni armiya va havo-desant bo‘linmalari bilan almashtirgandan so‘ng o‘zgartirildi.
“Hozirda vaziyat tinchdek taassurot uyg‘otishi mumkin. Ammo, afsuski, bu vaqtinchalik sukunat”, — deya qo‘shimcha qildi u. “Vagner” XHK asoschisi Yevgeniy Prigojin 25-may kuni o‘z bo‘linmalari shahardan olib chiqilishini e’lon qilgandi.
Izoh (0)