Farg‘ona viloyatida tarkibida kuchli taʼsir qiluvchi moddalar bo‘lgan dori vositalari muomalaga kiritilishining oldi olindi, deb xabar beradi Bosh prokuratura huzuridagi departament.
Qayd etilishicha, departamentning Marg‘ilon shahar bo‘limi tomonidan DXX xodimlari bilan hamkorlikda tezkor tadbir o‘tkazilgan. Tadbirda R.S. ismli shaxs tarkibida psixotrop moddalar bo‘lgan 588 dona dori vositalarini fuqaro A.A.ga 2 950 dollarga, M.M. ismli shaxs esa kuchli taʼsir qiluvchi 3 348 dona dori vositasini fuqaro M.A.ga 6,1 million so‘mga sotgan vaqtlarida ashyoviy dalillar bilan ushlangan.
Shu kabi, departamentning Bag‘dod tumani bo‘limi tomonidan o‘tkazilgan tezkor tadbirda “Sh.I.” xususiy korxonasiga qarashli dorixona rahbari Sh.Yu. tarkibida kuchli taʼsir qiluvchi moddalar bo‘lgan 130 dona dori vositasini o‘tkazgan vaqtida ashyoviy dalillar ushlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergovga tegishliligi bo‘yicha yuborilgan.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarma harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)