O‘zbekistonda abituriyentlarning oliy taʼlim muassasalariga kirish uchun tegishli hujjatlarni onlayn topshirish uchun bitiruvchilarning pasport (ID karta) maʼlumotlarini ABITUR elektron dasturiga kiritish talab etiladi. Bu hujjatsiz OTMga kirish uchun elektron ariza topshirib bo‘lmaydi.
OTMga hujjat topshirishda faqat ID karta (pasport) va attestat kerak bo‘ladi. Faqatgina shu hujjatlardagi maʼlumotlarni bazaga kiritish yetarli.
Maktab va maktabgacha taʼlim vazirligiga ko‘ra, maktablarni tamomlayotgan 390 mingdan ortiq o‘quvchining 16 yoshga to‘lgan 23 ming nafari (6 foizi) pasport (ID karta) olmagani sababli ularning maʼlumotlari elektron bazaga hozircha kiritilmagan bo‘lib, ular tezroq ID karta olishlari kerak.
Pasport (ID karta) olish uchun hududiy ichki ishlar organlarining Migratsiya va fuqarolikni rasmiylashtirish bo‘limlari va Davlat xizmatlari markaziga murojaat etish zarur.
O‘zbekistonda ID kartadan foydalanish
2021-yil 1-yanvardan boshlab barcha yangi tug‘ilgan chaqaloqlarga, O‘zbekiston fuqarolariga, fuqaroligi bo‘lmagan shaxslarga va O‘zbekiston hududida doimiy yashaydigan chet el fuqarolariga biometrik pasport o‘rniga 10 yil muddatga egasining shaxsini va fuqaroligini tasdiqlovchi hujjat sifatida identifikatsiya ID kartasi berilmoqda.
ID kartalar faqat O‘zbekiston hududida amal qiladi. ID-kartalarni berish tizimli ravishda 2021-yil 1-yanvardan 2030-yil 1-yanvargacha mamlakat aholisi uchun qo‘shimcha yuklamasiz amalga oshiriladi.
2022-yil 1-yanvardan O‘zbekiston fuqarosi, O‘zbekistonda doimiy yashovchi chet el fuqarolari va fuqaroligi bo‘lmagan shaxlarning identifikatsiya ID kartasi hamda O‘zbekiston fuqarosining xorijga chiqish biometrik pasporti (“zagranpasport”, “qizil pasport”)ni rasmiylashtirish va berish davlat xizmatlari markazlari orqali yo‘lga qo‘yilgan.
Izoh (1)
Паспорт билан ҳужжат топшириб бўладими? Ёки фақат ID бўлиши керакми.