Samarqand viloyati Paxtachi tumanida 3 nafar voyaga yetmagan bola daryoga cho‘kib ketgani to‘g‘risida xabar berilgandi. Bosh prokuratura matbuot kotibi Hayot Shamsutdinovning ma’lum qilishicha, cho‘kib ketgan ikki nafar voyaga yetmagan bolaning ham jasadlari topilgan.
25-may kuni soat 14:00 larda Paxtachi tumanida 3 nafar voyaga yetmagan bola Zarafshon daryosiga cho‘milish maqsadida borib, ehtiyotsizliklari oqibatida cho‘kib ketgan. FVB hamda IIB xodimlari tomonidan olib borilgan qidiruv ishlari natijasida bir nafar bolaning murdasi topilgandi.
Ikki kun davomida qolgan ikki nafar bolani qidirib topish ishlari olib borilgan.
O‘zbekistonda 2022-yil yoz mavsumida 142 nafar fuqaro cho‘kish bilan bog‘liq vaziyat tufayli vafot etgan. Baxtsiz hodisalar 51 holatda cho‘milish taqiqlangan, ruxsat etilmagan, cho‘milish uchun sharoit bo‘lmagan, xavfli suv havzalarida cho‘milganlik oqibatida, 85 holatda esa ehtiyotsizlik sabab yuzaga kelgan.
Ushbu cho‘kkanlarning 45,3 foizi voyaga yetmaganlar hisobiga to‘g‘ri keladi. Ehtiyotsizlik oqibatida yuzaga kelgan 85 kishining cho‘kishi daryolar, kanallar hamda ariqlarning ustidagi suv, gaz, chiqindi oqova suv quvurlaridan yo‘lni qisqartirish maqsadida ko‘prik sifatida foydalanib o‘tishlari hamda suv havzalari qirg‘oq bo‘ylarida xavfsizlik qoidalariga rioya etmagani sababli yuz bergan.
Izoh (0)