Qashqadaryo viloyatida o‘yinchoq pistoletni mashina oynasidan chiqarib, yo‘l harakati qoidalarini buzgan holda harakatlangan haydovchi javobgarlikka tortildi. Bu haqda viloyat IIB axborot xizmati xabar berdi.
Qayd etilishicha, Shahrisabz tumani “Keldihayot” mahallasida yashovchi fuqaro avtomashinasida yo‘lning qatnov qismida ilonizi bo‘lib harakatlanib, atrofdagilar e’tiborini o‘ziga tortgan. Shuningdek, haydovchi yonidagi o‘yinchoq pistoletni mashina oynasidan chiqarib, namoyishkorona harakat qilgan.
Holat yuzasidan olib borilgan surishtiruvlar davomida qoidabuzar haydovchi Ma’muriy javobgarlik to‘g‘risidagi kodeksning 125-modda (transport vositalaridan foydalanish qoidalarini buzish) 3-qismi, 128-modda (haydovchilarning transport vositalarini piyodalar yo‘lkalaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi) 3-qismi va 183-moddasida (mayda bezorilik) nazarda tutilgan huquqbuzarlikni sodir etgan.
“Mashinalar menga yo‘l bermagani uchun ularni quvib o‘tdim va o‘yinchoq pistoletni chiqarib ketdim… Shunchaki, qiziqish uchun qildim… Qilgan ishimdan afsusdaman”, — deydi haydovchi.
Holat jinoyat ishlari bo‘yicha Shahrisabz tuman sudida ko‘rib chiqilib, haydovchiga nisbatan 5 sutka ma’muriy qamoq jazosi tayinlandi.
2022-yil aprelda Buxoro shahri 39-son ixtisoslashtirilgan maktab o‘quvchisi yonidan to‘pponcha topilgandi. Shu yilning mart oyida esa O‘zbekiston hududiga Rossiyadan noqonuniy qurol olib o‘tish bilan bog‘liq holatlarga chek qo‘yilgan edi.
Izoh (0)