Angliya Premyer Ligasida mavsumning eng yaxshi futbolchisi aniqlandi

“Manchester Siti” hujumchisi Erling Holand Angliya Premyer Ligasida mavsumning eng yaxshi futbolchisi deb topildi.

Norvegiyalik futbolchi muxlislarning ovoziga ko‘ra eng yaxshi futbolchi, deya e’tirof etildi.

Holand Kevin de Bryuyne (“Manchester Siti”), Harri Keyn (“Tottenhem”), Markus Reshford (“Manchester Yunayted”), Martin Edegor, Bukayo Saka (ikkalasi ham “Arsenal”) va Kiran Trippyer (“Nyukasl”) kabi futbolchilarni ortda qoldirdi.

Holand “Manchester Siti”ning to‘rtinchi, ketma-ket uchinchi ushbu sovrinni qo‘lga kiritgan futbolchisiga aylandi. Avvalroq bu sovringa Vensan Kompani (2011/12), Kevin de Bryuyne (2019/20, 2021/22) va Ruben Diashlar (2020/21) ega chiqqan. 

Norvegiyalik joriy mavsum Angliya chempionatida 35 ta o‘yin o‘tkazib, 36 ta gol urdi va Premyer Liga rekordini o‘rnatdi. 

Shuningdek, Erling 8 ta golli uzatmaga ham mualliflik qildi.