Habib Nurmagomedov tizzasidagi jarohat bilan UFC rekordini o‘rnatgan jang haqida (video)
Yengil vazn toifasida UFC sobiq chempioni Habib Nurmagomedov 2013-yilning 25-may sanasida UFC tarixidagi rekordlardan birini yangilagan. U Abel Truxilyoga qarshi jangda 21 ta muvaffaqiyatli teykdaunni amalga oshirgan. Bu uch raund uchun aql bovar qilmas natija hisoblanadi. Undan oldin ham, undan keyin ham hech kim, hatto, 25 daqiqalik jangda ham bunchalik ko‘p omadli teykdaun amalga oshirmagan.
Truxilyo jang so‘ngida norozi bo‘lib hakamga e’tiroz bildirdi. Taniqli sharhlovchi Jo Rogan darhol amerikalik jangicha javob qaytargan:
“Seni oktagonning har bir dyuymiga uloqtirgan vaqtda qanday qilib hakamga e’tiroz bildirishing mumkin?”.
Habib Nurmagomedovning o‘zi ko‘p yillar o‘tganidan keyin rekord haqida eslab, Truxilyoni ko‘proq yiqitmaganidan afsusda ekanini, jang vaqtida tarix yaratyotganini bilmaganini, aytgandi.
“Jangdan avval chap tizzamni jarohatlab olgandim. Deyarli mashg‘ulot o‘tkaza olmasdim. Jangga kirganimda, uni yiqitdim. Ammo Truxilyo o‘rnidan turdi, chunki men uning yelkasidan ololmadim. Oyog‘imni to‘g‘rilay olmadim, chunki tizzam og‘riyatgandi. Men, uni har raundda uloqtirardim. Agar aniq rekordlar borligini bilganimda... 2013-yilda, rekordlar haqida hech kim bilmas edi. Faqat keyinroq bildimki, Shon Sherk besh raundlik jangda 16 ta teykdaun bilan rekord o‘rnatgan, men esa 3 raundda 21 ta teykdaun qildim. Agar bilganimda ko‘proq uloqtirgan bo‘lardim. Menda vaziyatlar bo‘ldi. Uning turishiga imkon bermay yana uloqtirgan bo‘lardim. Sekundantlarimga teykdaunlarni sanashini aytgan bo‘lardim. Hozir odamlar ma’lum bir rekordni ko‘rishlari va uni yangilashga harakat qilishlari mumkin”, — degan edi jangchi.
Habib Nurmagomedov jangdan oldin qanday qilib tizzasini jarohatlab olgani esa alohida hikoya. Dog‘istonlik sportchi AKA lageri vaqtida har bir sparringda, hatto eng umidsiz pozitsiyalarda ham shunday harakat qildiki, oxir-oqibat jarohat oldi. UFC kamari uchun sobiq da’vogar, Habibning o‘sha yillardagi sherigi Grey Meynard dog‘istonlikning matonatini eslab, haligacha hayratda ekanini aytadi.
“Abel Truxilyoga qarshi jangga tayyorlanayotgan vaqtda Habibning tizzasi qanday jarohatlanganini eslayman. Ushbu jarohat tufayli u lagerning yarmini mashq qilmasdan o‘tkazgandi. Barcha teykdaunlar uchun o‘lguncha kurashardi. Bir vaziyatda men uni deyarli aylantirgandim, biroq shu vaqtda Habib tizzasidan jarohat oldi. U jarohat olsa ham o‘zini aylantirishlariga yo‘l qo‘ymasdi. Maxluq”, — deya eslaydi Meynard.
