Англия Премьер Лигасида мавсумнинг энг яхши футболчиси аниқланди 

“Манчестер Сити” ҳужумчиси Эрлинг Ҳоланд Англия Премьер Лигасида мавсумнинг энг яхши футболчиси деб топилди.

Норвегиялик футболчи мухлисларнинг овозига кўра энг яхши футболчи, дея эътироф этилди.

Ҳоланд Кевин де Брюйне (“Манчестер Сити”), Ҳарри Кейн (“Тоттенҳэм”), Маркус Рэшфорд (“Манчестер Юнайтед”), Мартин Эдегор, Букайо Сака (иккаласи ҳам “Арсенал”) ва Киран Триппьер (“Ньюкасл”) каби футболчиларни ортда қолдирди.

Ҳоланд “Манчестер Сити”нинг тўртинчи, кетма-кет учинчи ушбу совринни қўлга киритган футболчисига айланди. Аввалроқ бу совринга Венсан Компани (2011/12), Кевин де Брюйне (2019/20, 2021/22) ва Рубен Диашлар (2020/21) эга чиққан. 

Норвегиялик жорий мавсум Англия чемпионатида 35 та ўйин ўтказиб, 36 та гол урди ва Премьер Лига рекордини ўрнатди. 

Шунингдек, Эрлинг 8 та голли узатмага ҳам муаллифлик қилди.