Moskva ikkinchi G‘arbiy okrug harbiy sudi asli o‘zbekistonlik bo‘lgan va muhojirlar huquqlari himoyachisi Bahrom Hamroyevni “terrorizmni oqlash” va “terrorchilik faoliyatini tashkil etish”da aybdor deb topib, 14 yilga ozodlikdan mahrum qildi. Bu haqda sud matbuot xizmatiga tayanib, “TASS” xabar bermoqda.
“Sud Hamroyevni 14 yilga qattiq rejimdagi koloniyaga hukm qildi, u uch yilni qamoqxonada o‘tkazishi kerak”, — deya sud matbuot kotibi Irina Jirnovadan iqtibos keltirgan agentlik.
Tomonlar bahsida ayblovchi taraf Hamroyevni 21 yilga ozodlikdan mahrum qilishni so‘ragan.
Hamroyevga nisbatan Rossiya Federatsiyasi Jinoyat kodeksining 205.2-moddasi 2-qismi (terrorizmni ommaviy oqlash) va 205.5-moddasining 1-qismi (Rossiya Federatsiyasi qonunchiligiga muvofiq terrorchi deb topilgan tashkilot faoliyatini tashkil etish) ayblovlari qo‘yilgan.
Tergov organlari maʼlumotlariga ko‘ra, Hamroyev “Hizb ut-Tahrir” xalqaro terrorchilik guruhi aʼzosi hisoblanadi.
Rossiya huquq-tartibot idoralari Hamroyevga nisbatan 2022-yil fevral oyi oxirida jinoiy ish ochgan edi. Xavfsizlik kuchlari huquq himoyachisining ijtimoiy tarmoqlardagi postlarini “Hizb ut-Tahrir” partiyasini qo‘llab-quvvatlash va “terrorizmni oqlash” deb hisoblagan. 25-fevral kuni Hamroyev tergov izolyatoriga joylashtirilgan.
Hamroyevga ikkinchi modda bo‘yicha ish ochilgani oktabr oyida maʼlum bo‘ldi. U “Hizb ut-Tahrir” bilan aloqadorlikda gumon qilinib, ta’qibga uchragan musulmonlarga yordam bergani uchun “terrorchi tashkilot faoliyatini tashkil etish”da ayblangan.
Hamroyev o‘z aybini tan olmadi. U hech qachon “Hizb ut-Tahrir”ga aʼzo bo‘lmaganini, faqat uning aʼzosi deb gumon qilingan odamlarning huquqlarini himoya qilish bilan shug‘ullanganini taʼkidladi.
OAV yozganidek, so‘nggi yillarda Hamroyev doimiy ravishda Rossiya rasmiylari tomonidan bosimni his qilib kelgan. 2016 va 2017-yillarda FXX xodimlari uning kvartirasida tintuv o‘tkazgan. Avvalroq 2010-yilda Hamroyev FXX xodimi tomonidan kaltaklangan, 2011-yilda uyi podyezdida noma’lum shaxslar pistirma bilan unga hujum qilgan. Ushbu hodisalarning hech biri tekshirilmagan.
2018-yilda huquq himoyachisi o‘z kvartirasida ikki xorijlikni soxta ro‘yxatga olishda aybdor deb topilib, 200 ming rubl miqdorida jarimaga tortilgan. 2019-yilda Hamroyev Tojikistondagi siyosiy mahbuslarni ozod etish talabi bilan Qizil maydonda bir kishilik piket o‘tkazgani uchun hibsga olingan va keyinchalik jarimaga tortilgan. Oradan bir necha oy o‘tib, huquq himoyachisi Moskvada “Adolatli saylovlar uchun” aksiyasini tashkillashtirishda ishtirok etganlikda ayblanib, yana hibsga olindi va jarimaga tortildi.
Ma’lumot uchun Bahrom Hamroyev 1963-yil 12-oktabrda Buxoro viloyati G‘ijduvon tumanida tug‘ilgan. 1980-yillarning oxiri — 1990-yillarning boshlarida O‘zbekiston “Birlik” xalq harakati faoli bo‘lgan. 1992-yilda Hamroyev Rossiyaga ko‘chib o‘tgan va u yerda muhojirlar huquqlarini himoya qilishni boshlagan.
Izoh (0)