Aleksandr Lukashenko adenovirus infeksiyasi bilan kasallangani uchun bir necha kun omma oldiga chiqmaganini aytdi.
“Meni o‘ladi deb o‘ylayotganlar, tinchlaning. Bu messenjerlar va Telegram kanallaridagi safsatalardan boshqa narsa emas. Adenovirus”, — dedi Lukashenko.
Lukashenkoning aytishicha, odatda adenovirus infeksiyasi “uch kunda davolanadi”, lekin u band bo‘lgani uchun vaqtida davolana olmagan. Uning Moskva, Grodno, Gomelga safarlari rejalashtirilgan edi.
Lukashenko o‘limgacha bormasligini ta’kidladi. “O‘layotganim yo‘q. Siz hali men bilan juda uzoq vaqt azob chekasiz”, — dedi u.
Lukashenko 9-maydan 15-maygacha omma oldiga chiqmadi. G‘alaba kuni u Moskvadagi paradda va Minskdagi gul qo‘yish marosimida qatnashgan, ammo boshqa protokol tadbirlarini o‘tkazib yuborgan. 14-may kuni u Belarus bayrog‘i, gerbi va madhiyasi kunini nishonlash marosimida ham qatnashmadi. Belarusning eng yirik mustaqil nashri “Zerkalo” vaziyatni “g‘ayrioddiy” deb baholadi. Ijtimoiy tarmoqlarda Belarus rahbarining sog‘lig‘i yomonlashgani, hatto, vafot etgani haqida qizg‘in bahslar boshlandi. Lukashenko 15-may kuni markaziy Harbiy-havo kuchlari qo‘mondonlik punktiga tashrifi chog‘ida ommaga ko‘rindi.
Izoh (0)