Rossiya G‘arb davlatlarining Ukrainadagi urushni muzlatib qo‘ymaslik zarurligi bo‘yicha pozitsiyasiga qo‘shiladi, dedi Rossiya prezidenti matbuot kotibi Dmitriy Peskov “TASS” agentligiga.
Kreml vakili Rossiya mojaroning muzlatilishiga yo‘l qo‘ymaslikni ta’kidlayotgan G‘arb bilan “hamjihat” ekanini aytdi.
“Rossiya faqatgina maxsus harbiy operatsiyani o‘z manfaatlarini ta’minlash, Rossiya oldida turgan maqsadlarga yo maxsus harbiy operatsiya yoki boshqa mavjud vositalar bilan erishish orqali yakunlash imkoniyatini ko‘rib chiqmoqda ”, — deya qo‘shimcha qildi u.
Agentlikning urushni tinch yo‘l bilan hal qilish bo‘yicha turli tomonlar taklif qilgan rejalardan qaysi biri Moskvaga yaqinroq ekani va bu reja uchun alohida variant bor-yo‘qligi haqidagi savoliga javob berar ekan, Peskov “hozircha tinch yo‘l bilan hal qilish uchun hech qanday shart-sharoit yo‘qligini” yana bir bor ta’kidladi.
Avvalroq Politico o‘z manbalariga tayanib, AQSH rasmiylari boshqa ehtimoliy ssenariylar qatorida Rossiya—Ukraina urushi yillar davomida muzlatilgan mojaroga aylanishi ehtimolini ko‘rib chiqayotgani haqida xabar bergandi. Nashrning ta’kidlashicha, bu uzoq muddatli istiqbolda eng haqiqatga yaqin ssenariy bo‘lishi mumkin, chunki na Moskva, na Kiyev mag‘lubiyatni tan olishga tayyor emas.
G‘arb bir necha bor Rossiya va Ukraina o‘rtasidagi urushni muzlatishga qarshi chiqqan. Xususan, AQSH Davlat kotibi Entoni Blinken, Buyuk Britaniya bosh vaziri Rishi Sunak va Germaniya kansleri Olaf Shols bunga qarshi ekani haqida bayonot bergan.
2022-yilning dekabrida Ukraina prezidenti Vladimir Zelenskiy ham Rossiya bilan urushni muzlatishga qarshiligini bildirgandi. Ukraina yetakchisi ofisi rahbari maslahatchisi Mixail Podolyakning aytishicha, mojaro muzlatilgan taqdirda Ukraina “yangi Shimoliy Koreya"ga aylanadi.
Izoh (0)