AQSHning Texas shtati, Dallas shahrida dasturiy ta’minot ishlab chiqaruvchi millioner Brayan Jonson yana o‘smirlarga xos tanaga ega bo‘lishni maqsad qilgan. “Biologik yoshni pasaytirish” uchun u har yili taxminan 2 million dollar sarflaydi.
Jonsonning boyligi taxminan 400 million dollarga baholangan. U keksayishga qarshi yangi jarayonni ishlab chiqishga umid qilmoqda. Jarayonda uning barcha a’zolari, jumladan teri, miya va yurakni 18 yoshdagi holatiga keltirish maqsad qilingan.
Millioner eng zamonaviy tibbiy tekshiruvlar va muolajalarga, uning tanasini yuqori formada ushlab turish uchun mukammal ovqatlanish, uyqu va jismoniy mashqlar tartibini ishlab chiqadigan mutaxassislarga va buni amalga oshirishda yordam beradigan shifokorlar jamoasiga katta miqdorda pul sarflaydi.
Jarayon kuniga bir soatlik jismoniy mashqlar (haftada uch marta yuqori intensiv mashg‘ulotlar bilan), roppa-rosa 1977 kaloriyali diyeta, har kecha bir xil vaqtda uxlash va barcha turdagi tibbiy muolajalarni o‘z ichiga oladi.
Millioner yangi jarayonga o‘zining 17 yoshli o‘g‘li Talmajni ham qo‘shdi. U o‘ziga quyish uchun o‘g‘lining qon plazmasidan foydalanmoqda.
Plazma quyish odatda jigar kasalligi, qon ivishining yetarli emasligi yoki kuyish kabi kasalliklarga chalingan bemorlarni davolash uchun qo‘llanadi. Biroq millioner yosh yigitning qon plazmasi uning tanasini yoshartirishi mumkinligiga ishonmoqda. Ushbu protsedura minglab dollarga tushadi.
Oziq-ovqat va farmatsevtika idorasi odamlarni keksayishga qarshi kurashishda plazmadan foydalanish xavfidan ogohlantirgan, chunki jarayonning klinik foydasi tasdiqlanmagan.
“Umid shahri” milliy tibbiyot markazi biokimyogar Charlz Brennerning aytishicha, jarayon isbotlanmagan va nisbatan xavfli: “Biz bu usul insonni yoshartirish uchun yaroqli yoki yo‘qligini yetarlicha o‘rganganimiz yo‘q”.
Brayan Jonsonning o‘zi esa plazma quyish paytida olingan ma’lumotlarning natijalarini yaqin oylarda e’lon qilishni rejalashtirmoqda.
Izoh (0)