Avstriyaning Braunau shahridagi Adolf Gitler tug‘ilgan uyda kelgusida politsiya uchun inson huquqlari bo‘yicha treninglar o‘tkaziladi, deb xabar bermoqda mahalliy ORF telekanali.
Xabarga ko‘ra, binoni politsiya ehtiyojlariga moslashtirish uchun uni rekonstruksiya qilish ishlari kuzda boshlanishi rejalashtirilgan. Uyning taqdiri bilan shug‘ullanuvchi ekspertlar komissiyasi uni buzish yoki poydevoriga yodgorlik o‘rnatishdan bosh tortgan.
Uyni nima qilish haqidagi munozaralar uzoq vaqt davom etgan. Avstriya hukumati uy egasi Gerlinde Pommer bilan ko‘p yillik kelishmovchiliklardan so‘ng 2016-yilda uyni o‘z nazoratiga oldi. Pommerlar oilasi uyga qariyb bir asrdan beri egalik qilardi — uydan nogironlar uchun markaz sifatida foydalanilgan va Pommerga oyiga 5 000 yevrodan to‘langan.
2019-yilda uy hukumat mulkiga o‘tdi va egasiga 810 ming yevro miqdorida tovon puli berildi. Mamlakat Ichki ishlar vazirligi binoni politsiya bo‘limiga aylantirmoqchi ekanini ma’lum qildi. Vazirlikning ta’kidlashicha, “uydan kelajakda politsiya ehtiyojlari uchun foydalanish bu bino boshqa hech qachon milliy sotsializmni eslatmasligini aniq qilib ifodalashi lozim”.
Gitler 1889-yilda Germaniya chegarasiga yaqin joylashgan Braunau shahrida tug‘ilgan, uch yoshga to‘lganda uning oilasi shahardan ko‘chib ketgan.
1938-yilda u Germaniyada hokimiyat tepasiga kelganida, natsistlar uyni sotib olishgan. 1952-yilda, diktator vafotidan yetti yil o‘tgach, uy o‘zining dastlabki egalariga qaytarildi.
Izoh (0)