Hindiston farmatsevtika kompaniyalari 1-iyundan boshlab davlat laboratoriyalarida yo‘tal siroplari sifatini tekshirishi shart. Bu haqda mamlakat tashqi savdo bosh boshqarmasi buyrug‘iga tayanib, Reuters xabar berdi.
.jpg)
Eksport uchun mo‘ljallangan yo‘tal siroplariga majburiy test joriy etiladi. Qaror Gambiya va O‘zbekistonda Hindistonda ishlab chiqarilgan preparatlarni qabul qilgan 20 nafardan ortiq bolalar o‘limidan so‘ng Hindiston rasmiylari tomonidan qabul qilingan.
“Yo‘tal siropining eksporti 2023-yil 1-iyundan boshlab eksport namunalarini sinovdan o‘tkazish va ayrim davlat laboratoriyalarida sertifikat olish sharti bilan ruxsat etiladi”, — deyiladi hujjatda.
Hindiston 2022-2023 moliyaviy yilda (1-aprelda yakunlangan) 17,6 milliard dollarlik yo‘talga qarshi siroplarini eksport qilgan. Preparatlar Afrika, Birlashgan Arab Amirliklari, Buyuk Britaniya, Nepal va boshqa mamlakatlarga yetkazib beriladi.
Mart oyida Hindiston sifatsiz dori ishlab chiqaruvchilarga qarshi kurash doirasida 18 farmatsevtika kompaniyasining litsenziyalarini bekor qilgan. Hindistonda ishlab chiqarilgan preparatlar tufayli dunyo bo‘ylab o‘lim va kasallik haqidagi xabarlar fonida rasmiylar respublikaning 20 shtatida tekshiruv o‘tkazgan.
Nega Hindistonda ishlab chiqarilgan dorilar xavfsizlik bilan bog‘liq muammolarni keltirib chiqarmoqda?
Hindiston rivojlanayotgan mamlakatlarning tibbiy ehtiyojlarining katta qismini qondiradigan umumiy dori vositalarining dunyodagi eng yirik eksportchisi hisoblanadi.
Ammo so‘nggi oylarda ko‘plab hind firmalari o‘z dori-darmonlarining sifati uchun tekshiruvdan o‘tmoqda va mutaxassislar ushbu preparatlarning ishlab chiqarish amaliyotidan tashvishlanmoqda.
Oktabr oyida JSST global ogohlantirishni e’lon qilgan va Maiden Pharmaceuticals tomonidan ishlab chiqarilgan to‘rtta yo‘tal siropi Gambiyada buyrak shikastlanishidan 66 bolaning o‘limiga olib kelganini aytgan.
Hindiston hukumati ham, Maiden Pharmaceuticals kompaniyasi ham bu ayblovlarni rad etgan.
Mart oyida Hindiston yo‘tal siroplari O‘zbekistonda bolalarning o‘limiga aloqador bo‘lgan firmaning ishlab chiqarish litsenziyasini bekor qilgan.
O‘zbekistonda “Dok-1 Maks” siropining iste’mol qilinishi oqibatlari
Hindistonda ishlab chiqarilgan “Dok-1 Maks” siropini iste’mol qilish ortidan O‘zbekistonda 20 nafardan ortiq bola vafot etgani ma’lum qilingan.
Davlat xavfsizlik xizmati tomonidan “Dok-1 Maks” preparati bilan bog‘liq holat yuzasidan jinoyat ishi qo‘zg‘atilgan. O‘zbekistonda “Dok-1 Maks”ni ishlab chiqargan kompaniyaga tegishli barcha dorilar savdosi vaqtincha to‘xtatildi.
Shavkat Mirziyoyev 30-dekabrdagi yig‘ilishda Farmatsevtika tarmog‘ini rivojlantirish agentligi rahbari Sardor Kariyev ishdan olgan. Sardor Kariyev 2019-yilning fevralidan buyon Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi direktori lavozimida faoliyat yuritib kelayotgandi.
JSST O‘zbekistonda “Dok-1 Maks” dorisidan bolalar o‘lgani yuzasidan munosabat bildirgan. Hindiston hukumati esa “Dok-1 Maks” dorisini ishlab chiqaruvchi kompaniyaning litsenziyasini to‘xtatgan. Hindistonda “Dok-1 Maks” dorisini ishlab chiqargan zavod ustidan tekshiruvning dastlabki natijalari e’lon qilingan.
Sirop bilan bog‘liq o‘lim holati boshqa davlatlarda ham aniqlangani ma’lum bo‘ldi, biroq ular aynan qaysi preparatlar oqibatida ekani aytilmagan. Jumladan, Indoneziyada 2022-yildan beri 200 ga yaqin bola sirop iste’mol qilishi ortidan yuzaga kelgan o‘tkir buyrak shikastlanishidan vafot etgan. Gambiyada ham bolalar Hindiston farmatsevtika kompaniyasi tomonidan ishlab chiqilgan yo‘talga qarshi siropni iste’mol qilishi ortidan o‘lgan.
Izoh (0)