Shavkat Mirziyoyev Xitoyga davlat tashrifining tadbirlarga boy dasturi o‘z nihoyasiga yetdi. Bu haqda prezident matbuot xizmati xabar berdi.

Sian shahrida davlat rahbari Xitoy Xalq Respublikasi raisi Si Szinpin bilan muzokara o‘tkazdi, yakunda yetakchilar Qo‘shma bayonotni imzoladi va 2023—2027-yillarga mo‘ljallangan yangi davrdagi har tomonlama strategik sheriklikni rivojlantirish dasturini qabul qildi.

Tashrif doirasida jami 41 ta ikki tomonlama hujjat imzolandi, umumiy qiymati 25 milliard dollardan ziyod bo‘lgan yangi yuqori texnologik sanoat, savdo va investitsiya loyihalarini amalga oshirish yuzasidan kelishuvlarga erishildi Shuningdek, O‘zbekiston—Xitoy hamkorligi ko‘rgazmasi bilan tanishildi, yangi qo‘shma loyihalar ishga tushirildi va Xitoy ishbilarmon doiralari vakillari bilan uchrashuv o‘tkazildi.

Shu bilan birga, davlat rahbari Markaziy Osiyo—Xitoy birinchi sammitida ishtirok etib, mintaqaviy hamkorlikni rivojlantirish bo‘yicha muhim taklif va tashabbuslarni ilgari surdi. Aeroportda O‘zbekiston yetakchisini Xitoy Xalq Respublikasi madaniyat va turizm vaziri Xu Xepin, Shensi muzofoti gubernatori Chjao Gan va faxriy qorovul kuzatib qo‘ydi. Prezident Shavkat Mirziyoyev Toshkentga jo‘nab ketdi.