Navoiy viloyati Qiziltepa tumanida Zarmetan nomli qishloq bor. Bu qishloqda qatiq o‘zgacha usulda tayyorlanadi. Uning o‘ziga xosligi shundaki, quyuqligi, mazasi bilan birga kosani bir lahzaga to‘nkarganda ham oqib ketmaydi.
Guliston shahrida bo‘lib o‘tgan III Xalqaro baxshichilik festivalida viloyatlarning o‘ziga xos ovqatlari ham namoyish etildi. Unda ishtirok etgan tadbirkor Dilafro‘z Hamroyeva “Daryo” muxbiriga Zarmetan qatig‘ini tayyorlash jarayoni haqida qisqacha gapirib berdi.
“Qatiq toza va sifatli sutdan olinadi. Yaxshi ishlov berilib, mehr bilan tayyorlanadi. Dastlab qaynatilib, kosalarga solib chiqiladi. Keyin muzlatgichda sovitiladi va bir muddat ustiga doka yopib qo‘yiladi. Shu bilan tayyor bo‘ladi”, — dedi Dilafro‘z Hamroyeva.
Uning qo‘shimcha qilishicha, Zarmetan qishlog‘ida qatiqlarni to‘y va tug‘ilgan kun tadbirlarida dasturxonga tortish anʼanaga aylangan.
Izoh (0)