Vengriya poytaxti Budapesht shahrida 19-may kuni O‘zbekiston—Vengriya oliy taʼlim muassasalari rektorlari II forumi o‘tkazildi. Bu haqda Oliy taʼlim, fan va innovatsiyalar vazirligi axborot xizmati xabar berdi.
Xabarga ko‘ra, yig‘ilishda universitetlarning farmakologiya, farmatsevtika va tibbiyot mutaxassisliklari bo‘yicha kadrlar tayyorlash hamda o‘quv jarayoniga innovatsiyalarni joriy etish, qishloq xo‘jaligi, suv resurslaridan foydalanish sohasida texnolog mutaxassislar tayyorlash, zamonaviy biotexnologiyalar yordamida sanoat suvini tozalash va yerlarni tomchilatib sug‘orish, Vengriya OTMda o‘zbek tilini o‘qitish masalalari muhokama qilindi.
Vengriya tomoniga respublika hukumati tomonidan amalga oshirilayotgan taʼlim va ilmiy loyihalar, jumladan, kimyo sanoati uchun o‘quv-ishlab chiqarish klasterini yaratish loyihasi taqdim etildi. So‘ng muzokaralar yakuni bo‘yicha muhandislik, mexatronika, robototexnika, ijtimoiy-iqtisodiy sohalarda 30 dan ortiq memorandum va shartnoma imzolanib, kadrlarni birgalikda tayyorlash bo‘yicha o‘zaro hujjatlar almashildi.
Shuningdek, ikkita seksiya muzokaralari natijalari o‘qib eshittirilib, forum yakunlari yuzasidan rezolyutsiya qabul qilindi.
Izoh (0)