Qashqadaryo viloyatining Qarshi shahrida prokuratura xodimi pichoqlandi. Bu haqda “Daryo” manbalari xabar berdi.
Maʼlum bo‘lishicha, voqea Qarshi shahridagi mahallalarning birida 2023-yilning 26-apreldan 27-aprelga o‘tar kechasi sodir bo‘lgan.
“Viloyat prokuraturasida ishlovchi xodim erli ayol bilan avvaldan tanish bo‘lib, munosabat o‘rnatib yurgan bo‘lgan. 26-aprel kuni kechasi prokuratura xodimi o‘sha ayolning uyiga borgan. Xiyonat qilayotgan ayolning eri buni avvaldan sezib yurgan bo‘lgan va o‘sha kuni ularni uyida ushlab olgan. Shundan so‘ng prokuratura xodimini pichoqlagan”, — deydi “Daryo” manbasi.
“Daryo” muxbiri bilan suhbatlashgan gumonlanuvchining advokati Akmal Qultoyev ham voqeani tasdiqladi.
“Haqiqatan ham shunaqa holat sodir bo‘lgan. Voqea 26-aprel kechasi sodir bo‘lgan”, — deydi advokat.
Aniqlanishicha, pichoqlangan prokuratura xodimi ayni paytda tirik.
“Voqeaga 23 kun bo‘ldi. Ammo shu paytgacha bu haqda hech qayerda maʼlumot berilmadi. Imkon qadar voqeani yopdi-yopdi qilishmoqchi”, — deydi bu haqda tahririyatga xabar bergan manba.
“Daryo” mazkur holat yuzasidan Bosh prokuratura hamda Qashqadaryo viloyati prokuraturasi axborot xizmati rahbarlariga so‘rov yo‘llab, prokuratura xodimining pichoqlanish sababi bilan qiziqdi.
Qashqadaryo viloyat prokuraturasi axborot xizmati masʼuli ayni paytda mazkur holatdan bexabar ekanini, ammo o‘rganib, batafsil maʼlumot berilishini bildirdi.
Izoh (0)