Qashqadaryo viloyatining Shahrisabz shahrida faoliyat yurituvchi advokat va yurist konsultant taʼmagirlikka yo‘l qo‘ydi. Advokat 1,5 ming dollarga hokimiyatdagi aloqasi orqali noqonuniy egallab olingan yer maydonini fermer xo‘jaligi hisobiga qaytarishda yordam berish evaziga, Shahrisabz shahar yuridik xizmat ko‘rsatish markazi bosh yuristkonsulti (sobiq prokuratura xodimi) 180 million so‘mlik kamomadni yopib berishi evaziga 3 ming dollar talab qildi. Advokat va yuristning bu qilmishi DXXning viloyat boshqarmasi va hamkor tashkilotlar o‘tkazgan tezkor tadbirda fosh bo‘ldi.
Maʼlum bo‘lishicha, viloyatning Yakkabog‘ tumanida yashovchi fuqaro DXXning viloyat boshqarmasi boshlig‘iga murojaat qilib, shahrisabzlik advokat fermer xo‘jaligiga tegishli bo‘lgan, ammo fuqarolar tomonidan o‘zboshimchalik bilan egallab olingan 35 sotix yer maydonini tuman hokimligidan sudga daʼvo ariza kiritib, olib berishini vaʼda qilayotganini bildirgan.
Murojaatchining qo‘shimcha qilishicha, advokat bu qilmishi uchun hokimlikdagi tanishlariga pul berishini aytib, 1,5 ming dollar so‘ragan.
DXXning viloyat boshqarmasiga yana bir murojaat kelib tushgan bo‘lib, unda Shahrisabz shahar yuridik markaz bosh konsulti Shahrisabz tuman sobiq Mahalla va nuroniylarni qo‘llab-quvvatlash bo‘limida shahar prokuraturasi tergovchisi tomonidan aniqlangan 180 million so‘mlik kamomadni yopib berishini aytib, 3 ming dollar so‘rayotgani maʼlum qilingan.
DXX viloyat boshqarmasi hamda hamkor tashkilotlar tomonidan o‘tkazilgan tezkor tadbirda har ikki holat ham aniqlanib, advokat va yuridik markaz bosh konsultantga nisbatan jinoyat ishi qo‘zg‘atilgan. Ayni paytda tergov-surishtiruv jarayonlari olib borilmoqda.
Izoh (0)