Baxmut yaqinidagi Rossiya qo‘shinlari har kuni bir batalonni yo‘qotmoqda. Bu haqda Ukraina mudofaa vaziri Aleksey Reznikovga tayanib, “RBK” xabar berdi.
Reznikovning so‘zlariga ko‘ra, Baxmut yo‘nalishida o‘ldirilgan va yaralangan Rossiya jangchilarining umumiy soni 70 mingni tashkil etadi.
“Bizning hisob-kitoblarga ko‘ra, ular Baxmutda bir kunda bir batalonni yo‘qotmoqda va bu davom etadi”, — dedi Reznikov.
Mudofaa vaziri Baxmutda Ukraina harbiylari ruslarning hujum salohiyatini kamaytirayotgani va ularning oldingi chiziqning boshqa qismlarida hujumga o‘tishiga yo‘l qo‘ymayotganini ta’kidladi.
Urush boshidan beri ruslarning yo‘qotishlari
Ukraina qurolli kuchlari bosh shtabining 19-may kuni ertalabki xulosasiga ko‘ra, urush boshlanganidan beri Rossiyaning umumiy jangovar yo‘qotishlari halok bo‘lganlar va yaralanganlar bilan taxminan 220 420 kishini tashkil qilmoqda. Ulardan 660 tasi so‘nggi 24 soat ichida qayd etilgan. Bundan tashqari, bosqinchilar harbiy texnikada katta yo‘qotishlarga uchramoqda.
Ukraina Qurolli kuchlarining o‘z yo‘qotishlari haqidagi ma’lumotlar oshkor etilmagan.
Izoh (0)