Toshkent metropolitenida 2023-yil yanvar—mart oylarida 38,7 million yo‘lovchi tashilgan. Bu haqda Statistika agentligi xabar berdi.
Qayd etilishicha, ushbu ko‘rsatkich 2022-yilning mos davriga nisbatan 11,3 million nafarga ko‘p.
2023-yil yanvar—mart oylarida Toshkent metropolitenida bir kunda o‘rtacha 430,1 ming nafar yo‘lovchilar tashilgan bo‘lib, 2022-yilning mos davri bilan solishtirilganda 41,3 foizga ko‘p.
2021-yil yanvar oyida Shavkat Mirziyoyev Toshkent metrosidagi yo‘lovchilar oqimini kuniga 500 ming kishidan 1 millionga yetkazish maqsadini qo‘ygandi. “Boshlaganimizda, kuniga 120—130 ming kishi edi. 2020-yilga qadar 250 ming edi. Umuman olganda, maqsadim — 1 million. Agarda bunga erishsak, ana shunda havo rostdan tozlanadi, odamlar o‘zgaradi. Hozirgi tahlillarga ko‘ra, 500 ming kishi chiqyapti. Bu meni qanoatlantirmaydi”, — degan davlat rahbari.
Sergeli metro liniyasini qurish ishlari 2016-yilning dekabrida boshlangan bo‘lib, u 2020-yilning kuzida foydalanishga topshirilishi lozim bo‘lgan. Loyihaga ko‘ra, metropolitenning yangi yo‘nalishi “Choshtepa”, “Toshkent halqa yo‘li”, “Sergeli”, “Afrosiyob”, “Qipchoq” va “Chinor” nomlariga ega bo‘lishi kerak edi.
2020-yil sentabr oyida Toshkent metropoliteni xodimi Rustam Po‘latov yangi metro liniyalarining raqamlanishi vaqtincha ekanini bildirib, “Qolgan bekatlar ham qurib bitkazilgandan keyin Toshkent shahar hokimligining tegishli idoralari bekatlarga nom qo‘yadi. Atamashunoslar bunda bekatlar qurilgan joyning tarixi, o‘tmishini o‘rganib, shunga ko‘ra nom tanlaydi”, — deb aytgandi.
2023-yil aprel boshida Toshkent shahar hokimligi metropoliten yerusti liniyasining Do‘stlik—Qo‘yliq va Olmazor—Sergeli yo‘nalishlaridagi bekatlarni nomlash bo‘yicha ovoz berishga chaqirdi. Prezident Shavkat Mirziyoyev 8-fevral kuni Toshkent metropoliteni yerusti metrosi qurilish ishlari bilan tanishgandi. Shu yilning aprel oxirida esa Toshkent yerusti metrosining yana 5 ta bekati foydalanishga topshirilgan.
Izoh (0)