Toshkentning 3 ta tumanida elektr ta’minoti vaqtincha o‘chirildi

Toshkent shahrining Yakkasaroy hamda Bektemir tumanlari hududidagi ayrim aholi yashash xonadonlari hamda kichik tadbirkorlik subyektlarida 16-may kuni elektr energiyasi soat 18:00 ga qadar vaqtinchalik o‘chirildi. Bu haqda “Hududiy elektr tarmoqlari” AJ Toshkent shahar filiali xabar berdi.

Ta’kidlanishicha, bu isteʼmolchilarga sifatli va barqaror elektr energiyasini yetkazib berilishini taʼminlash, shuningdek, elektr tarmoqlarida sodir bo‘lishi mumkin bo‘lgan avariya holatlarini oldini olish, hamda taʼmirlash ishlarini xavfsiz bajarish maqsadida amalga oshirilmoqda.

• Bektemir tumani “Zabardast” MFY ko‘chalari hududidagi aholi yashash xonadonlarida;
• Yashnobod tumani Bahor, Abadiyat, Abay, Jarboshi, Tashisti hamda Iqbol ko‘chalari hududidagi aholi yashash xonadonlarida;
• Yakkasaroy tumani “Yakkasaroy” MFYning Yakkasaroy, B.Hiloliy, B.Hiloliy 3-tor hamda Oqsaroy ko‘chalari hududidagi aholi yashah xonadonlarida elektr energiyasi vaqtinchalik o‘chirilgan.

Qayd etilishicha, iste’molchilarga elektr energiyasini sifatli hamda ishonchli yetkazib berishda yuzaga kelishi mumkin bo‘lgan avariyali uzilishlarning oldini olish va tuman elektr ta‘minoti korxonasi tomonidan belgilangan davlat dasturlari asosida hududlarda past kuchlanishli elektr uzatish tarmoqlarini yangilash va modernizatsiya qilish ishlari bosqichma-bosqich amalga oshirib kelinmoqda.

“Hududiy elektr tarmoqlari” AJ Toshkent shahar filiali mazkur taʼmirlash ishlari tufayli elektr energiyasi taʼminotidagi vaqtincha uzilishlar sababli yetkazilayotgan noqulayliklar uchun ushbu hududlarda yashovchi isteʼmolchilardan uzr so‘raydi.

Kuni kecha “‘Yashil energiya’ sertifikatlari tizimini joriy etish chora-tadbirlari to‘g‘risida”gi prezident qarori qabul qilingandi. Qarorga muvofiq, elektrning qayta tiklanuvchi manbalar asosida ishlab chiqarilganini tasdiqlovchi “yashil energiya” sertifikati tizimi quyidagi bosqichlarda joriy etiladi:

• 2023-yil 1-iyuldan — “O‘zbekgidroenergo” AJdagi gidroelektr stansiyalarida ishlab chiqarilgan elektr uchun;
• 2023-yil 1-oktabrdan — quyosh, shamol va gidroelektr stansiyalarida ishlab chiqarilgan elektr uchun.