Тошкент метрополитенида 2023 йил январь—март ойларида 38,7 миллион йўловчи ташилган. Бу ҳақда Статистика агентлиги хабар берди.
Қайд этилишича, ушбу кўрсаткич 2022 йилнинг мос даврига нисбатан 11,3 миллион нафарга кўп.
2023 йил январь—март ойларида Тошкент метрополитенида бир кунда ўртача 430,1 минг нафар йўловчилар ташилган бўлиб, 2022 йилнинг мос даври билан солиштирилганда 41,3 фоизга кўп.
2021 йил январь ойида Шавкат Мирзиёев Тошкент метросидаги йўловчилар оқимини кунига 500 минг кишидан 1 миллионга етказиш мақсадини қўйганди. “Бошлаганимизда, кунига 120—130 минг киши эди. 2020 йилга қадар 250 минг эди. Умуман олганда, мақсадим — 1 миллион. Агарда бунга эришсак, ана шунда ҳаво ростдан тозланади, одамлар ўзгаради. Ҳозирги таҳлилларга кўра, 500 минг киши чиқяпти. Бу мени қаноатлантирмайди”, — деган давлат раҳбари.
Сергели метро линиясини қуриш ишлари 2016 йилнинг декабрида бошланган бўлиб, у 2020 йилнинг кузида фойдаланишга топширилиши лозим бўлган. Лойиҳага кўра, метрополитеннинг янги йўналиши “Чоштепа”, “Тошкент ҳалқа йўли”, “Сергели”, “Афросиёб”, “Қипчоқ” ва “Чинор” номларига эга бўлиши керак эди.
2020 йил сентябрь ойида Тошкент метрополитени ходими Рустам Пўлатов янги метро линияларининг рақамланиши вақтинча эканини билдириб, “Қолган бекатлар ҳам қуриб битказилгандан кейин Тошкент шаҳар ҳокимлигининг тегишли идоралари бекатларга ном қўяди. Атамашунослар бунда бекатлар қурилган жойнинг тарихи, ўтмишини ўрганиб, шунга кўра ном танлайди”, — деб айтганди.
2023 йил апрель бошида Тошкент шаҳар ҳокимлиги метрополитен ерусти линиясининг Дўстлик—Қўйлиқ ва Олмазор—Сергели йўналишларидаги бекатларни номлаш бўйича овоз беришга чақирди. Президент Шавкат Мирзиёев 8 февраль куни Тошкент метрополитени ерусти метроси қурилиш ишлари билан танишганди. Шу йилнинг апрель охирида эса Тошкент ерусти метросининг яна 5 та бекати фойдаланишга топширилган.
Изоҳ (0)