Toshkentda yerusti halqa metro yo‘lining II bosqichi doirasida qurib bitkazilgan 5 ta bekatda yo‘lovchi tashuvlari boshlandi. Bu haqda Transport vazirligi matbuot xizmati xabar berdi.
Qo‘yliq—Quruvchilar uchastkasida qurilish ishlari tugatilgan 5 ta bekat umumiy uzunligi 7,74 kilometr. Shunday qilib, Toshkent metropolitenining bekatlari soni 48 taga yetdi. Yerusti metrosi qurilishining ikkinchi bosqichi to‘liq yakunlanishi bilan Toshkent metropolitenining jami uzunligi 70 kilometrdan ziyod, bekatlar soni 50 ta bo‘ladi.
Sergeli metro liniyasini qurish ishlari 2016-yilning dekabrida boshlangan bo‘lib, u 2020-yilning kuzida foydalanishga topshirilishi lozim bo‘lgan. Loyihaga ko‘ra, metropolitenning yangi yo‘nalishi “Choshtepa”, “Toshkent halqa yo‘li”, “Sergeli”, “Afrosiyob”, “Qipchoq” va “Chinor” nomlariga ega bo‘lishi kerak edi.
2020-yil sentabr oyida Toshkent metropoliteni xodimi Rustam Po‘latov yangi metro liniyalarining raqamlanishini vaqtincha ekanini bildirib, “Qolgan bekatlar ham qurib bitkazilgandan keyin Toshkent shahar hokimligining tegishli idoralari bekatlarga nom qo‘yadi. Atamashunoslar bunda bekatlar qurilgan joyning tarixi, o‘tmishini o‘rganib, shunga ko‘ra nom tanlaydi”, deb aytgandi.
2023-yil aprel boshida Toshkent shahar hokimligi metropoliten yerusti liniyasining Do‘stlik—Qo‘yliq va Olmazor—Sergeli yo‘nalishlaridagi bekatlarni nomlash bo‘yicha ovoz berishga chaqirdi. Prezident Shavkat Mirziyoyev 8-fevral kuni Toshkent metropoliteni yerusti metrosi qurilish ishlari bilan tanishgandi.
Izoh (0)