“Tabiiy gaz va suyuq uglevodorodni qazib chiqarish, qayta ishlash hamda realizatsiya qilish hisobini yuritish tizimini takomillashtirish chora-tadbirlari to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar berdi.
Qarorga ko‘ra, 2023-yil 1-iyulgacha barcha tabiiy gazni qabul qilish va uzatish nuqtalariga onlayn elektron hisoblagichlar o‘rnatiladi. Mazkur hisoblagichlar soliq organlarining axborot tizimlari bilan integratsiya qilinib, yagona avtomatlashtirilgan tabiiy gaz harakati tizimi joriy etiladi.
2023-yil 1-oktabrdan O‘zbekistondan tabiiy gazni quvurlar orqali tashiydigan korxonalarning gazni qabul qilish va uzatish nuqtalariga xromatograf hamda elektron hisoblagichlar o‘rnatilishi majburiy hisoblanadi. 2023-yil 1-iyulgacha tabiiy gaz va suyuq uglevodorodni realizatsiya qilish to‘g‘risidagi shartnomalarga oid maʼlumotlarni kiritish uchun axborot tizimi joriy etiladi.
2023-yil 1-oktabrdan:
- tabiiy gaz va suyuq uglevodorodni realizatsiya qilish to‘g‘risidagi shartnomalarga oid maʼlumotlar Soliq qo‘mitasining axborot tizimiga kiritib boriladi;
- mazkur shartnomalar yuzasidan elektron hisobvaraq-fakturalar Soliq qo‘mitasining axborot tizimiga kiritilgan maʼlumotlar asosida shakllantiriladi.
2024-yil 1-oktabrgacha respublikada qo‘shimcha ikkita gaz o‘lchash stansiyasi quriladi.
O‘zbekiston 2023-yilning birinchi choragida 152,9 million dollarlik gaz import qilgan. Gaz eksporti bo‘yicha vaziyat umuman boshqacha. Uch oyda 27,4 mln dollarlik gaz eksport qilingan va bu 2022-yilning ilk choragiga nisbatan 70,6 foizga kamroq.
Izoh (0)