Namanganda 12 yoshli bola attraksionda aylangan vaqtida bosh qismidan tan jarohati olib vafot etdi. Bu haqda Bosh prokuratura matbuot kotibi Hayot Shamsutdinov ma’lum qildi.
Mazkur holat yuzasidan prokuratura tomonidan Jinoyat kodeksining 257-moddasi (mehnatni muhofaza qilish qoidalarini buzish) bilan jinoyat ishi qo‘zg‘atilgan. Namangan shahar IIO FMB Tergov bo‘limi tomonidan tergov harakatlari olib borilmoqda.
Ijtimoiy tarmoqlarda tarqalgan ma’lumotlarga ko‘ra, vafot etgan bola Uchqo‘rg‘on tumanidagi 8-sonli maktabning o‘quvchisi bo‘lib, u maktab jamoasi bilan Namangan shahridagi “Bobur” bog‘iga sayohatga chiqqan.
Aprel boshlarida Farg‘ona viloyati Rishton tumanida joylashgan markaziy istirohat bog‘idagi attraksiondan 17 yoshli qiz tushib ketgani haqida xabar berilgandi. Tekshiruv natijalari bosh miya episxeti, bosh miyaga oz miqdorda qon quyilish, ikkinchi bo‘yin umurtqasi tanasida sinish, qovurg‘alarida siniq aniqlangan.
Undan oldin esa Buxoro shahrida joylashgan istirohat bog‘ida er-xotin va ularning farzandi attraksiondan yiqilgandi. “Kontexnazorat”ning ma’lum qilishicha, ushbu attraksiondan foydalanish taqiqlangan bo‘lgan. 2022-yil noyabrda Qashqadaryoda 13 yoshli qiz attraksiondan yiqilib, og‘ir jarohat olgan edi.
Izoh (0)