“Putin va Zelenskiy Afrika davlatlarining tinchlik tashabbusi bo‘yicha missiyasini qabul qilishga tayyor” — JAR prezidenti

Rossiya va Ukraina tinchlik tashabbusi bo‘yicha Afrika yetakchilarining missiyasini qabul qilishga kelishib oldi. Bu haqda Janubiy Afrika respublikasi prezidenti Siril Ramafosaga tayanib, Reuters xabar berdi.

Ramafosa Afrika davlatlari nomidan bu masalani Rossiya prezidenti Vladimir Putin va Ukraina rahbari Vladimir Zelenskiy bilan muhokama qilganini aytdi.

“Men bu tashabbusni Zambiya, Senegal, Kongo, Uganda, Misr va JAR nomidan taqdim etdim. Men gaplashish imkoniga ega bo‘lgan har ikki prezident ham Afrika davlatlari rahbarlarining Moskva va Kiyevdagi missiyasini qabul qilishga tayyor ekanliklariga kelishib oldi”, — dedi u.

JAR prezidentining taʼkidlashicha, u ikki davlat rahbarlari bilan Afrika yetakchilari bilan ushbu masala bo‘yicha o‘zaro hamkorlikka tayyorgarlik ko‘rishni boshlashga kelishib olgan. Birlashgan Millatlar Tashkiloti bosh kotibi Antoniu Guterrish, Afrika Ittifoqi ofisi, AQSH, Britaniya va Yevropa Ittifoqi tashabbus haqida allaqachon xabardor qilingan.

Ramafosaning taʼkidlashicha, baʼzi afrikalik yetakchilar mintaqa Ukrainadagi konfliktni hal qilishga hissa qo‘shadigan tashabbus ko‘rsatishi zarur.