Janubiy Afrika respublikasi (JAR) mamlakat prezidenti Siril Ramafosaning so‘zlaridan farqli o‘laroq, Xalqaro jinoyat sudidan (XJS) chiqish niyatida emas. Bu haqda JAR prezidentining idorasiga tayanib, AFP xabar berdi.
Prezident idorasi Ramafosaning XJSdan chiqish haqidagi avvalgi bayonotini noto‘g‘ri deb atadi va Janubiy Afrika sudining yurisdiksiyasini qabul qilishdan bosh tortmasligiga ishontirdi. Idoradagilarning qo‘shimcha qilishicha, Ramafosa hukmron partiya pozitsiyasini yanglish tarzda ma’qullagan.
Gap Janubiy Afrika prezidentining 25-aprel kuni jurnalistlar uchun brifingda bergan bayonoti haqida ketmoqda. Unda Ramafosa hukmron Afrika millik kongressi partiyasi mamlakatning XJS yurisdiksiyasidan chiqishini oqilona deb hisoblashi haqida aytgandi. Unga ko‘ra, “XJS ayrim davlatlarga nisbatan adolatsiz munosabatda bo‘lmoqda”.
Undan avval, dam olish kunlarida partiya milliy ijroiya kengashining yig‘ilishi bo‘lib o‘tgan va unda XJS yurisdiksiyasidan chiqish masalasi muhokama qilingan. “Xalqaro jinoiy sud hammaning manfaatiga emas, balki ozchilikning manfaatlariga xizmat qilmoqda”, — degan o‘shanda AMK bosh kotibi Fikila Mbalula.
Putinni hibsga olish orderi
17-mart kuni Gaagadagi Xalqaro jinoiy sud Rossiya prezidenti Vladimir Putinni hibsga olishga order berdi. U Ukrainaning bosib olingan hududlaridan bolalarni Rossiyaga noqonuniy deportatsiya qilishda gumon qilinmoqda. Xuddi shunday order Bolalar ombudsmanı Mariya Lvova-Belovaga nisbatan ham chiqarilgan.
2023-yil avgustda JARda BRIKS sammiti bo‘lib o‘tadi, unga Vladimir Putin taklif qilingan. Shu munosabat bilan mamlakat rasmiylari Rossiya bilan maslahatlashuvlar o‘tkazishga va’da bergan, chunki Xalqaro jinoiy sud yurisdiksiyasini tan olgan har qanday davlat uning qarorlarini bajarishi, jumladan, hibsga olish uchun order berilgan shaxslarni Gaagaga ekstraditsiya qilishi kerak.
Izoh (0)