Berlin Pekindan Xitoyning Germaniyada faoliyat yuritayotgan maxfiy politsiya bo‘limlarini yopishni talab qildi, deb yozmoqda Bloomberg. Germaniya hukumati bunday bo‘limlar Xitoyga xorijdagi xitoyliklarni “nazorat qilish va qo‘rqitish” uchun kerak, deb hisoblaydi.
Bu borada Xitoy tomoni bilan muzokaralar 2022-yilning noyabridan beri davom etmoqda, deydi Germaniya Tashqi ishlar vazirligi matbuot kotibi Andrea Zasse. Uning so‘zlariga ko‘ra, fevral oyida Xitoy hukumati Germaniyada noqonuniy politsiya bo‘limlarini tashkil etayotganini rad etgan. Biroq Pekin Germaniyadagi ayrim “xizmat ko‘rsatish shoxobchalari” ishlayotganini tan olgan va ularni yopishga va’da bergan.
Shunga qaramay, Ichki ishlar vazirligi matbuot kotibi Maksimilian Kall Germaniyada kamida ikkita Xitoy politsiyasi bo‘limi faoliyat yuritayotganini, ularning ishi mahalliy hokimiyat tomonidan diqqat bilan kuzatilayotganini aytdi. Kallning so‘zlariga ko‘ra, “bular statsionar ofislar emas, balki mobil uchastkalardir”. Politsiya vakilining ta’kidlashicha, turli mamlakatlarda faoliyat yuritayotgan bunday bo‘limlar asosan Xitoy razvedka idoralari bilan aloqada bo‘ladi.
“Germaniya federativ respublikasi XXR bilan chet el politsiyasi deb ataladigan idoralar ishi bo‘yicha ikki tomonlama shartnomani yakunlagani yo‘q”, — deb tushuntirgandi Ichki ishlar vazirligi vakili kuzda t-online nashriga. Vazirlik qayd etishicha, hukumat “Xitoyning Germaniyadagi diplomatik vakolatxonalari Diplomatik munosabatlar to‘g‘risidagi Vena konvensiyasi va Konsullik aloqalari to‘g‘risidagi Vena konvensiyasi doirasida ish olib borishini ta’minlashga harakat qilmoqda”.
Bloomberg iqtibos keltirgan Xitoy elchixonasi bayonotida aytilishicha, “Xitoy hukumati doimo xalqaro huquqni qo‘llab-quvvatlagan va barcha mamlakatlarning suvereniteti va yurisdiksiyasini hurmat qilgan”. Diplomatlar bunday pozitsiyani bir necha bor ko‘rsatganini taʼkidlab, “Germaniya tomoni bunga xolisona munosabatda bo‘lishiga va keyingi shubhalarga o‘rin qoldirmasligiga” umid bildirgan.
Madridda joylashgan Safeguard Defenders inson huquqlari tashkiloti ma’lumotlariga ko‘ra, Xitoy xorijda o‘nlab noqonuniy politsiya bo‘limlarini tashkil qilgan. 2022-yilning kuzida AQSH Federal qidiruv byurosi (FQB) xodimlari Bruklindagi Chayna-tounda reyd o‘tkazib, Xitoyning xorijdagi noqonuniy “politsiya bo‘limlari”ni topgandi. G‘arb rasmiylarining fikricha, xorijdagi xizmat ko‘rsatish markazlari deb atalayotgan bu bo‘limlardan aslida xorijdagi Xitoy fuqarolari, jumladan dissidentlar ustidan josuslik qilish uchun foydalanilmoqda. Jumladan, The New York Times gazetasi Xitoy hukumatining xitoyliklarni vatanga qaytishga majburlashdan iborat “Tulki ovi” dasturini tilga olgan.
Izoh (0)