AQSH Markaziy razvedka boshqarmasi o‘z Telegram kanalini ochdi va rossiyaliklarni muassasa bilan ma’lumot almashishga chaqiruvchi videorolik e’lon qildi. Video Markaziy razvedka boshqarmasining YouTube, Twitter, Instagram va Facebook akkauntlariga ham joylandi.
“Ushbu video Tor anonim axborot tizimi yordamida Markaziy razvedka boshqarmasi bilan bog‘lanish uchun qiyin, ammo muhim qarorga kelgan xayoliy ruslar haqida hikoya qiladi. MRB Rossiya haqidagi haqiqatni bilishni istaydi, bu haqiqatni biladigan va bizga ayta oladigan ishonchli odamlarni qidirmoqdamiz. Siz harbiy zobitmisiz? Siz razvedka, diplomatiya, ilm-fan, yuqori texnologiyalar sohasida ishlaysizmi yoki shunday odamlarni taniysizmi? Sizda iqtisodiyot yoki Rossiya Federatsiyasining yuqori rahbariyati haqida ma’lumot bormi? Biz bilan bog‘laning. Balki atrofingizdagilar haqiqatni eshitishni istamayotgandir. Biz istaymiz”, — deyiladi rolik tavsifida.
Rossiyaning Ukrainaga keng ko‘lamli bosqini “rossiyaliklarning bizga kelib, AQSHga zarur bo‘lgan maʼlumotlarni taqdim etishi uchun tarixiy imkoniyatni yaratdi”, deydi CNN telekanaliga MRB manbasi. Suhbatdoshning so‘zlariga ko‘ra, Markaziy razvedka boshqarmasi “nozik hududlarda ishlayotgan va qimmatli maʼlumotlarga ega bo‘lgan” rossiyaliklarning endilikda quyidagi so‘zlarga quloq solishiga umid qilmoqda: “Biz sizni tushunamiz, ehtimol siz o‘ylaganingizdan ham yaxshiroq tushunamiz”.
2022-yilning noyabridayoq MRB razvedka xizmati boshlig‘i Devid Marlou agentlik Ukrainadagi urushdan norozi rossiyaliklar bilan hamkorlik qilish niyatida ekanini aytgandi.
Rossiya TIV rasmiy vakili Mariya Zaxarova Markaziy razvedka boshqarmasining Telegram kanali ochilishiga munosabat bildirar ekan, “murojaat qilganlarni kuzatish uchun juda qulay platforma”, dedi.
Hozirga qadar uch mingga yaqin foydalanuvchi AQSH MRB Telegram kanaliga obuna bo‘lgan.
Izoh (0)