Markaziy saylov komissiyasining muddatidan ilgari O‘zbekiston prezidenti sayloviga bag‘ishlangan navbatdagi majlisi bo‘lib o‘tdi.
MSK maʼlumotiga ko‘ra, siyosiy partiyalarning vakolatli vakillari ishtirok etgan majlisda partiyalarning muddatidan ilgari O‘zbekiston prezidenti saylovida ishtirok etishiga ijozat berish to‘g‘risidagi masala ko‘rib chiqilgan.
Saylov kodeksiga muvofiq Markaziy saylov komissiyasi tomonidan O‘zbekiston Xalq demokratik partiyasi, Tadbirkorlar va ishbilarmonlar harakati – O‘zbekiston liberal-demokratik partiyasi, O‘zbekiston “Adolat” sotsial-demokratik partiyasi, O‘zbekiston Ekologik partiyasi hamda O‘zbekiston “Milliy tiklanish” demokratik partiyasining muddatidan ilgari prezident saylovida ishtirok etishga ijozat berishni so‘rab taqdim qilgan hujjatlarini ko‘rib chiqib, mazkur partiyalarga 2023-yil 9-iyul kuni bo‘lib o‘tadigan saylovlarda ishtirok etishi uchun ijozat berilgan va tegishli qarorlar qabul qilingan.
Shuningdek, majlis doirasida, siyosiy partiyalarning vakolatli vakillariga saylovda ishtirok etishga ijozat berilgani to‘g‘risidagi guvohnoma hamda belgilangan namunadagi imzo varaqalari blankalari topshirilgan.
Majlisda qabul qilingan qarorlar Markaziy saylov komissiyasining veb-saytiga joylashtiriladi hamda ular to‘g‘risidagi maʼlumotlar markaziy matbuotda eʼlon qilinadi.
Muddatidan ilgari O‘zbekiston prezidenti saylovi
“O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun 6-may kuni prezident tomonidan imzolandi. Saylov kodeksiga kiritilgan o‘zgartirishlarga ko‘ra prezident muddatidan ilgari O‘zbekiston prezidenti saylovini tayinlagan taqdirda, saylov ushbu kodeksga to‘liq muvofiq holda 2 oy ichida o‘tkaziladi. Bunda saylovga tayyorgarlik ko‘rish hamda uni o‘tkazishga doir tadbirlarni amalga oshirish muddatlari Markaziy saylov komissiyasi tomonidan belgilanadi.
Izoh (0)