Farg‘ona viloyati Rishton tumanida joylashgan markaziy istirohat bog‘idagi attraksiondan 17 yoshli qiz tushib ketdi. Bu haqda viloyat IIB axborot xizmati xabar berdi.

Qayd etilishicha, 2005-yilda tug‘ilgan N.O. 23-mart kuni tuman markaziy istirohat bog‘idagi “Piratskiy korabl” nomli attraksionda uchayotib, ehtiyotsizlik oqibatida attraksiondan tushib ketib, tan jarohati olgan hamda tuman tibbiyot birlashmasining qabul bo‘limiga olib kelingan.

Mazkur holat yuzasidan shu kunning o‘zida Rishton tumani IIB tomonidan tegishli tartibda hujjatlar rasmiylashtirilgan. N.O.ning olgan tan jarohati bo‘yicha sudga oid tibbiy ekspertiza tayinlangan.

Hodisa sabablariga oydinlik kiritish, mehnatni muhofaza qilish va texnika xavfsizligi qoidalariga rioya qilingan yoki qilinmaganini aniqlash yuzasidan Bandlik boshqarmasiga tegishli hujjatlar taqdim etilgan.

“Hozirgi kunda voyaga yetmagan N.O. Bag‘dod tuman tibbiyot birlashmasida shifokorlarning nazoratida davolanmoqda va ahvoli yaxshilanyapti”, — deyiladi xabarda.

Holat yuzasidan Rishton tumani IIB tomonidan tergovga qadar tekshiruv harakatlari olib borilmoqda.

Avvalroq Buxoro shahrida joylashgan istirohat bog‘ida er-xotin va ularning farzandi attraksiondan yiqilgani to‘g‘risida xabar berilgandi. “Kontexnazorat”ning ma’lum qilishicha, ushbu attraksiondan foydalanish taqiqlangan bo‘lgan.