Buxorodagi parkda er-xotin farzandi bilan tushib ketgan attraksiondan foydalanish taqiqlangan bo‘lgan — “Kontexnazorat”

Buxoro shahrida joylashgan istirohat bog‘ida er-xotin va ularning farzandi attraksiondan yiqilgani to‘g‘risida xabar berilgandi. Sanoat xavfsizligi davlat qo‘mitasi baxtsiz hodisa yuzasidan ma’lumot berdi. 

Tog‘-kon, geologiya va sanoat xavfsizligini nazorat qilish inspeksiyasi (“Kontexnazorat”)ning ma’lum qilishicha, 2022-yilning dekabr oyida favqulodda vaziyatlar bo‘linmalari xodimlari bilan hamkorlikda “Somoniylar” madaniyat va istirohat bog‘idagi attraksionlar, shu jumladan, “X.Sh.” Yakka tartibdagi tadbirkorga qarashli bo‘lgan “Tvister” attraksionining xavfsizlik holatini o‘rganish bo‘yicha profilaktik tadbir o‘tkazilgan.

Natijada ushbu attraksion statik va dinamik sinovlardan o‘tkazilmagani, attraksion egasi tomonidan attraksiondan foydalanish uchun belgilangan tartibda ruxsatnoma olinmagani, attraksiondan xavfsiz foydalanish bo‘yicha javobgar shaxs tayinlanmagani aniqlangan. O‘rganish o‘tkazgan ishchi guruh tomonidan ushbu kamchiliklarni bartaraf etish bo‘yicha ko‘rsatma berilgan hamda attraksiondan foydalanish taqiqlangan.

Shunga qaramasdan attraksiondan o‘zboshimcha foydalanilgani va javobgar shaxs tomonidan kundalik texnik nazorat amalga oshirilmagani natijasida attraksion o‘rindiqlarini tutib turuvchi metall moslama ichki tomonidan yemirilib, attraksion korpusidan uzilib ketgan va bir oila (3 kishi) jarohat olgan.

Holat yuzasidan ichki ishlar organlari tomonidan tekshiruv olib borilmoqda. “Kontexnazorat” inspeksiyasi tomonidan “Tvister” attraksioni tekshiruvini o‘tkazish biznes vakil bilan kelishilmoqda.

Eslatib o‘tamiz, 2022-yil noyabrda Qashqadaryoda 13 yoshli qiz attraksiondan yiqilib, og‘ir jarohat olgani, iyunda esa Andijonda 5 yoshli qizcha attraksiondan yiqilib tushgandi.