Футбол бўйича Чемпионлар Лигаси ярим финал жавоб ўйинида “Интер” ва “Милан” жамоалари 16 май, сешанба куни ўзаро тўқнаш келади.
Дастлабки учрашувда “нераззури” 2:0 ҳисобида ғалаба қозонган. Учрашувнинг 8-дақиқасида Эдин Жеко, 11-дақиқасида Генрих Мхитарян ўз ҳисобига гол ёздириб қўйганди.
Жамоалар ҳолати
“Милан” муваффақиятсизликка яқин. Клуб А Сериянинг сўнгги 11 туридан 8 тасида ғалаба қозона олмади. 13 май куни хавфли зонада турган “Специя”га (0:2) мағлуб бўлди. Амалдаги Италия чемпиони 2022/23 йилги мавсум кучли тўртликка ҳам кириши шубҳа остида қолмоқда. Ёзда жамоа ислоҳотларни амалга ошириши кутилмоқда, ҳатто, Паоло Мальдини ҳам ўз постини тарк этиши мумкин.
Апрель ойи ўрталарида “Интер” тушкун кайфиятда эди. Лиганинг сўнгги 5 турида фақат бир очко жамғара олган. Бош мураббий Симоне Инзаги шаънига танқидлар ёғиларди. Чемпионлар Лигаси чорак финалидаги муваффақиятсизлик унинг истеъфосига сабаб бўларди. Бироқ “Бенфика” мусобақадан чиқариб юборилди. Шундан кейин “нераззури”ни тўхтатиб бўлмай қолди. Барча мусобақалардаги кетма-кет еттита ғалаба ва 21:3 тўплар нисбати. А Серияда учинчи ўринга қадар кўтарилди.
Жамоаларнинг сўнгги ўйинлари
“Интер”
- 30.04.2023. “Интер” — “Лацио” 3:1 (А Серия)
- 03.05.2023. “Верона” — “Интер” 0:6 (А Серия)
- 06.05.2023. “Рома” — “Интер” 0:2 (А Серия)
- 10.05.2023. “Милан” — “Интер” 0:2 (Чемпионлар Лигаси)
- 13.05.2023. “Интер” — “Сассуоло” 4:2 (А Серия)
“Милан”
- 29.04.2023. “Рома” — “Милан” 1:1 (А Серия)
- 03.05.2023. “Милан” — “Кремонезе” 1:1 (А Серия)
- 06.05.2023. “Милан” — “Лацио” 2:0 (А Серия)
- 10.05.2023. “Милан” — “Интер” 0:2 (Чемпионлар Лигаси)
- 13.05.2023. “Специя” — “Милан” 2:0 (А Серия).
Статистика
- “Милан” “Интер”га қарши сўнгги 9 та ўйиннинг 8 тасида биринчи бўлиб гол ўтказиб юбормоқда. 8 та ўйиннинг 3 тасида “россонери” мағлубиятга учрамаган — иккита ғалаба ва битта дуранг. Қолган 5 та ўйинда гол ура олмасдан мағлуб бўлди.
- Кубок баҳсларидаги ўзаро ўйинларда устунлик “Милан” томонда — 13:11. Кубок плей-оффларида кейинги босқичга чиқиш бўйича ҳам “россонери” олдинда — 8:5.
- “Интер” жорий мавсум “Милан” устидан барча мусобақаларда 3 марта ғалаба қозонди. “Нераззури” 1994/95 йилги мавсумдан буён илк бор бу вазифани уддалади.
- “Интер” 2022/23 йилги мавсум Чемпионлар Лигаси плей-офф баҳсларида мағлубиятга учрамади. 5 та ўйиннинг 4 тасини “қуруқ” ўтказди. Италия жамоалари ичида фақатгина “Ювентус” 1/8, 1/4 ва 1/2 финалларда мағлубиятга учрамасдан финалга қадар етиб борган.
- Симоне Инзаги “Интер” бошқарувида Кубокдаги қарама-қаршиликларнинг 12 тасидан фақат биттасида мағлуб бўлган (2021/22 йилги мавсум ЕЧЛ 1/8 финалида “Ливерпуль”га). Италия Кубогининг 7 та ўйинидан барчасида ғалаба қозонган, 2 марта Италия Суперкубогида зафар қучган, шунингдек, жорий мавсум Чемпионлар Лигасида 2 та рақибни доғда қолдирди.
- “Милан” ЕЧЛ плей-оффларининг сўнгги 16 тасидан фақат биттасида — 2007 йил “Бавария”га қарши ўйинда ғалаба қозонган (8 та дуранг, 7 та мағлубият).
- “Милан” Еврокубоклар тарихида бир марта дастлабки учрашувдаги икки ёки ундан кўп гол фарқини йўққа чиқара олган. “Россонери” 1985/86 йилги мавсум УЕФА Кубогида Франциянинг “Осер” клубига 1:3 ҳисобида мағлуб бўлган. Жавоб ўйинида эса 3:0 ҳисобида зафар қучган.
Мураббийларнинг ўйин олдидан фикрлари
Симоне Инзаги (“Интер”)
“Интер” ҳисобни сақлаб қолиш учун ҳимояга ётиб олмайди. Ҳа, ўйиннинг баъзи вақтларида ҳимояланишга мажбурмиз. Лекин бутун ўйин давомида эмас.
Дўстларим ўйин ҳаками француз экани (Клеман Тюрпен) ва рақиб жамоа сафида 4 нафар француз тўп суришига ишора қилди. Бироқ бу бизга муаммо эмас.
Стефано Пиоли (“Милан”)
Биринчи ўйиндан фарқли равишда майдонда яхшироқ ҳаракат қилиб, ғалабага интилмоқчимиз. Бундай ўйинларга тайёргарлик кўриш осон эмас, лекин мақсадимиз сари ҳаракат қиламиз.
Стандарт вазиятларда эҳтиёткорроқ бўлишимиз лозим, бу рақибнинг устун томони. Ундан ташқари ўзимиз ҳам имкониятлардан фойдаланиб қолишимиз керак. Биринчи ўйинда хато қилдик, энди бунга ҳаққимиз йўқ.
“Интер” ва “Милан” ўртасидаги баҳс Ўзбекистон вақти билан 16 майдан 17 майга ўтар кечаси 00:00 да старт олади.
Изоҳ (0)