O‘zbekistonda ilmiy-ta’lim sun’iy yo‘ldoshi ishlab chiqarilib, kosmosga uchiriladi

O‘zbekistonda CubeSat ilmiy-ta’lim sun’iy yo‘ldoshi ishlab chiqariladi va uchiriladi. Bu haqda “O‘zbekkosmos” axborot xizmati xabar berdi.

Toshkent shahrida 26–27-aprel kunlari 30 dan ortiq davlatdan 250 dan ziyod kosmik korporatsiya, agentlik va qo‘mita vakillarining uchrashuvi bo‘lib o‘tdi.

“O‘zbekkosmos” tomonidan tashkil etilgan ushbu xalqaro konferensiya doirasida Turkiya, AQSH, Qozog‘iston va BAA bilan bir qator qo‘shma loyihalar bo‘yicha kelishuvga erishildi. Ularning aksariyati soha uchun yangi kadrlar tayyorlashga qaratilgan.  

Konferensiya doirasidagi Turkiy davlatlar tashkilotiga a’zo va kuzatuvchi davlatlar kosmik agentlik va tegishli idoralari rahbarlarining 2-yig‘ilishida yoshlar uchun Turkiyaning Izmir shahrida joylashgan “Space Camp Turkey” oromgohida ta’lim dasturini tashkil qilishga kelishildi.