Toshkent shahrida 12-may kuni O‘zbekiston—Afg‘oniston—Pokiston temiryo‘l liniyasini qurish loyihasini muvofiqlashtirish ofisining rasmiy ochilish marosimi bo‘lib o‘tdi.
Ochilish marosimida prezidentning Afg‘oniston bo‘yicha maxsus vakili Ismatilla Ergashev, transport vaziri Ilhom Mahkamov, investisiyalar, sanoat va savdo vaziri maslahatchisi A.Xashimov, “O‘zbekiston temiryo‘llari” AJ raisining o‘rinbosari A.Kamalov, Pokiston elchisi A.Faruk, Afg‘oniston elchisi A.Ilmiy va Afg‘oniston temiryo‘l boshqarmasi raisi B.Sharafat ishtirok etishdi.
Loyiha ofisining tashkil etilishidan maqsad, loyihaning texnik-iqtisodiy asoslashni ishlab chiqish va amaliy bajarilishini tezlashtirish bo‘yicha qo‘shma chora-tadbirlarni muvofiqlashtirish hisoblanadi.
Tadbir ishtirokchilari loyiha ofisining o‘z vaqtida ochilishi, tomonlarning loyihani amalga oshirishni muntazam ravishda jadallashtirish bo‘yicha harakatlarini yo‘naltirishni alohida ta’kidladi.
“O‘zbekiston Respublikasi prezidentining tashabbusi bilan 2018-yildan buyon izchil samarali ishlar olib borilmoqda, loyiha ofisining ochilishi esa tomonlarning loyihani amalga oshirishni jadallashtirish borasidagi harakatlarining navbatdagi bosqichidir”, — dedi Ismatilla Ergashev.
“Loyiha qurilishini muvofiqlashtirish uchun to‘g‘ridan to‘g‘ri Toshkent shahrida loyiha ofisining o‘z vaqtida ochilishi Markaziy Osiyo mamlakatlarini Pokistonning 230 millionli aholisi bilan bog‘laydi, shuningdek, muqobil raqobatbardosh yo‘nalishlarda Arab dengizi havzasi davlatlari bilan o‘zaro savdo qilish imkoniyatlarini ochadi. Loyihani amalga oshirish mintaqalarni yuqori rivojlanish darajasiga olib chiqadi, shuningdek, umumiy tarixni hurmat qiladigan xalqlar o‘rtasidagi munosabatlarni tiklaydi”, — deya ta’kidladi Pokiston elchisi.
“Toshkent shahrida loyiha ofisining ochilishi tomonlar mutaxassislarining ishini bevosita yuzma-yuz shaklda yanada samarali tashkil etish imkonini beradi, shuningdek, loyihani amalga oshirishda Rossiya va Markaziy Osiyodan Janubiy Osiyo mamlakatlariga millionlab tonna tabiiy resurs va boshqa tovarlarni tashish imkoniyati paydo bo‘ladi. Shu bilan birga, Afg‘oniston tomoni Afg‘oniston iqtisodiyotining real sektorini rivojlantirishga ko‘proq e’tibor qaratayotgan O‘zbekistonga o‘z minnatdorchiligimni bildiraman”, — deya ta’kidladi Afg‘oniston temiryo‘l boshqarmasi raisi B.Sharafat.
11–12-may kunlari O‘zbekiston—Afg‘oniston—Pokiston temiryo‘l liniyasini qurish loyihasini yanada rivojlantirish bo‘yicha navbatdagi uch tomonlama muzokaralar bo‘lib o‘tdi. Unda tomonlar loyihani amalga oshirishni jadallashtirish bilan bog‘liq masalalarni muhokama qilgan.
Izoh (0)