Ichki ishlar vaziri Po‘lat Bobojonovning “Daryo” jurnalisti bilan suhbatida maʼlumot berilishicha, respublika miqyosida bo‘lib o‘tayotgan sayyor qabullarda bundan bir necha yil avval Ichki ishlar tizimidan nohaq ishdan olinib, ayni kunda lavozimiga qayta tiklashlarini so‘rab kelayotgan murojaatchilar juda ko‘p. Bu haqdagi vazir va jurnalist suhbati Qarshi shahrida respublika ishchi guruhi tomonidan tashkil etilgan sayyor qabulda bo‘ldi.
“Ko‘pchilik murojaatchilar qo‘shtirnoq ichidagi eski davr deymiz-ku, o‘sha paytda nohaq ishdan olinganini aytib, bugun tizimga qayta tiklashimizni so‘rab kelmoqda. Biz bu holatni o‘rganib, haq bo‘lganlarini ishga tiklayapmiz. Qolaversa, Ichki ishlarga taalluqli bo‘lmagan masalalarni ham eshitib, imkon qadar murojaatchiga yordam beryapmiz. Biz har bir murojaatni sinchiklab o‘rganib, imkon qadar adolatli yechim qilishga harakat qilyapmiz”, — deydi Ichki ishlar vaziri “Daryo” jurnalistining savollariga javob berar ekan.
Vazirning aytishicha, u Qarshi shahrida 12-may kuni soat 10:00 da boshlangan sayyor qabulda kechki 17:00 ga qadar 200 nafarga yaqin murojaatchi shikoyatini tinglagan.
“Qabulda moddiy yordam so‘raganlar, oilaviy ahvoli og‘ir ekanini aytgan murojaatchilar ham bor. Ularga uchinchi sektor rahbarlarini biriktirib, yordam beryapmiz. Hozirgi paytga qadar (o‘sha kuni soat 17:00 nazarda tutilmoqda. Tahririyat izohi) 200 nafarga yaqin murojaatchini tinglab, imkon qadar muammosiga yechim topdik. Hali murojaatchilarimiz ko‘p”, — deydi Ichki ishlar vaziri Po‘lat Bobojonov.
Vazirning qayd etishicha, Qarshi shahrida bo‘lib o‘tishi rejalashtirilgan sayyor qabulda 3 ta viloyat fuqarolarining muammosi tinlanishi rejalashtirilgan bo‘lsa-da, boshqa viloyatdan kelgan murojaatchilar ham tinglangan.
“Bugungi qabulda aslida Qashqadaryo, Surxondaryo va Buxoro viloyati fuqarolarining murojaatlari tinglanadi deyilgandi. Lekin qabulda nafaqat bu uchta viloyatdan, balki Toshkent shahri, Navoiy, Samarqand va Xorazm viloyatlaridan ham murojaatchilar kelib, yordam so‘ramoqda. Murojaatchilar orasida Ichki ishlar tizimiga ishga kiraman deganlar, qo‘shtirnoq ichidagi eski davrda nohaq ishdan bo‘shatilganini aytib, tizimga qaytarishimizni so‘rab kelayotganlar ham bor. Hech qaysi murojaatchini umidsiz qaytarmayapmiz”, — deydi Ichki ishlar vaziri.
Qashqadaryo viloyat IIB axborot xizmati rahbari Javlon Baxtiyevning “Daryo”ga qo‘shimcha qilishicha, Qarshi shahridagi qabul davomida aholidan turli masalalarga doir 305 ta murojaat qabul qilingan.
“Murojaatlarning 275 tasi bevosita ichki ishlar organlari faoliyati bilan bog‘liq, yaʼni 86 tasi ichki ishlar organlariga xizmatga qayta tiklash, 90 tasi surishtiruv va tergov harakatlari bilan bog‘liq muammo, 43 tasi ichki ishlar organlariga ishga (o‘qishga) kirish, 31 tasi probatsiya hisobidagi shaxslarni jazo muddatidan oldin shartli ravishda ozod qilish hamda 2 tasi mahkumlarning boshqa jazoni ijro etish muassasasiga o‘tkazish masalalaridir. Bundan tashqari 23 nafar fuqarodan minnatdorlik mazmunidagi xatlar ham kelib tushgan. Murojaatlarning 172 tasi (56,4 foizi) ijobiy hal etilib, chuqur o‘rganilishi talab etilayotgan 133 ta (43,6 foiz) murojaatning ijrosi nazoratga olindi”, — deydi Javlon Baxtiyev.
Masʼulning qo‘shimcha qilishicha, qabul jarayonida 31 nafar probatsiya hisobida turib tuzalish yo‘liga o‘tgan shaxsni muddatidan oldin shartli ravishda jazodan ozod qilish uchun o‘rnatilgan tartibda tegishli sudlarga taqdimnomalar kiritilgan. 39 nafar surishtiruv yoki dastlabki tergov harakatlaridan norozi fuqarolarning murojaatlari qanoatlantirilgan. 9 nafar sobiq xodimlar ichki ishlar organlariga qayta ishga tiklangan. Ichki ishlar organlariga xizmatga kirish istagini bildirgan 40 nafar fuqaroga navbatdagi tanlovda ishtirok etishga ruxsat etilgan.
Izoh (0)