Ички ишлар вазири Пўлат Бобожоновнинг “Дарё” журналисти билан суҳбатида маълумот берилишича, республика миқёсида бўлиб ўтаётган сайёр қабулларда бундан бир неча йил аввал Ички ишлар тизимидан ноҳақ ишдан олиниб, айни кунда лавозимига қайта тиклашларини сўраб келаётган мурожаатчилар жуда кўп. Бу ҳақдаги вазир ва журналист суҳбати Қарши шаҳрида республика ишчи гуруҳи томонидан ташкил этилган сайёр қабулда бўлди.
“Кўпчилик мурожаатчилар қўштирноқ ичидаги эски давр деймиз-ку, ўша пайтда ноҳақ ишдан олинганини айтиб, бугун тизимга қайта тиклашимизни сўраб келмоқда. Биз бу ҳолатни ўрганиб, ҳақ бўлганларини ишга тиклаяпмиз. Қолаверса, Ички ишларга тааллуқли бўлмаган масалаларни ҳам эшитиб, имкон қадар мурожаатчига ёрдам беряпмиз. Биз ҳар бир мурожаатни синчиклаб ўрганиб, имкон қадар адолатли ечим қилишга ҳаракат қиляпмиз”, — дейди Ички ишлар вазири “Дарё” журналистининг саволларига жавоб берар экан.
Вазирнинг айтишича, у Қарши шаҳрида 12 май куни соат 10:00 да бошланган сайёр қабулда кечки 17:00 га қадар 200 нафарга яқин мурожаатчи шикоятини тинглаган.
“Қабулда моддий ёрдам сўраганлар, оилавий аҳволи оғир эканини айтган мурожаатчилар ҳам бор. Уларга учинчи сектор раҳбарларини бириктириб, ёрдам беряпмиз. Ҳозирги пайтга қадар (ўша куни соат 17:00 назарда тутилмоқда. Таҳририят изоҳи) 200 нафарга яқин мурожаатчини тинглаб, имкон қадар муаммосига ечим топдик. Ҳали мурожаатчиларимиз кўп”, — дейди Ички ишлар вазири Пўлат Бобожонов.
Вазирнинг қайд этишича, Қарши шаҳрида бўлиб ўтиши режалаштирилган сайёр қабулда 3 та вилоят фуқароларининг муаммоси тинланиши режалаштирилган бўлса-да, бошқа вилоятдан келган мурожаатчилар ҳам тингланган.
“Бугунги қабулда аслида Қашқадарё, Сурхондарё ва Бухоро вилояти фуқароларининг мурожаатлари тингланади дейилганди. Лекин қабулда нафақат бу учта вилоятдан, балки Тошкент шаҳри, Навоий, Самарқанд ва Хоразм вилоятларидан ҳам мурожаатчилар келиб, ёрдам сўрамоқда. Мурожаатчилар орасида Ички ишлар тизимига ишга кираман деганлар, қўштирноқ ичидаги эски даврда ноҳақ ишдан бўшатилганини айтиб, тизимга қайтаришимизни сўраб келаётганлар ҳам бор. Ҳеч қайси мурожаатчини умидсиз қайтармаяпмиз”, — дейди Ички ишлар вазири.
Қашқадарё вилоят ИИБ ахборот хизмати раҳбари Жавлон Бахтиевнинг “Дарё”га қўшимча қилишича, Қарши шаҳридаги қабул давомида аҳолидан турли масалаларга доир 305 та мурожаат қабул қилинган.
“Мурожаатларнинг 275 таси бевосита ички ишлар органлари фаолияти билан боғлиқ, яъни 86 таси ички ишлар органларига хизматга қайта тиклаш, 90 таси суриштирув ва тергов ҳаракатлари билан боғлиқ муаммо, 43 таси ички ишлар органларига ишга (ўқишга) кириш, 31 таси пробация ҳисобидаги шахсларни жазо муддатидан олдин шартли равишда озод қилиш ҳамда 2 таси маҳкумларнинг бошқа жазони ижро этиш муассасасига ўтказиш масалаларидир. Бундан ташқари 23 нафар фуқародан миннатдорлик мазмунидаги хатлар ҳам келиб тушган. Мурожаатларнинг 172 таси (56,4 фоизи) ижобий ҳал этилиб, чуқур ўрганилиши талаб этилаётган 133 та (43,6 фоиз) мурожаатнинг ижроси назоратга олинди”, — дейди Жавлон Бахтиев.
Масъулнинг қўшимча қилишича, қабул жараёнида 31 нафар пробация ҳисобида туриб тузалиш йўлига ўтган шахсни муддатидан олдин шартли равишда жазодан озод қилиш учун ўрнатилган тартибда тегишли судларга тақдимномалар киритилган. 39 нафар суриштирув ёки дастлабки тергов ҳаракатларидан норози фуқароларнинг мурожаатлари қаноатлантирилган. 9 нафар собиқ ходимлар ички ишлар органларига қайта ишга тикланган. Ички ишлар органларига хизматга кириш истагини билдирган 40 нафар фуқарога навбатдаги танловда иштирок этишга рухсат этилган.
Изоҳ (0)