Qashqadaryo viloyati Chiroqchi tumanidagi 19-sonli maktab- internat hududida 50 ga yaqin daraxt kesilgani aniqlandi. Tabiat resurslari vazirligi viloyat boshqarmasi holat yuzasidan ma’lumot berdi.

O‘rganishlar jarayonida 2022-yil dekabr oyida hech qanday ruxsatnomasiz daraxtlar kesilganlik holati aniqlangan va hozirgi paytda ushbu kesilgan daraxtlarning tag qismidan o‘sib chiqqani ma’lum bo‘lgan.

Shuningdek, bir dona tol daraxti to‘liq qurib ketgani sababli boshqarmaning maktab tomonidan davlat xizmatlariga orqali qilgan murojaati bo‘yicha 401-sonli xulosa asosida kesib olingani aniqlangan.

Qolgan 42 tup tol daraxtlariga tegishli ruxsatnoma olmasdan kesilgan holati bo‘yicha 19-sonli maktab-internat direktoriga nisbatan Ma’muriy javobgarlik to‘g‘risidagi kodeksning 79-moddasi bilan bayonnoma rasmiylashtirilib, 3 million 300 ming so‘mdan jarima hamda 25 million 575 ming so‘m zarar qo‘llanildi.