Qashqadaryo viloyati Qamashi tumanidagi bozorda huquq-tartibot idoralari xodimlari O‘zbekiston bayrog‘i rangidagi va “Bitiruvchi” yozuvi bo‘lgan tasma taqqan yigitni qo‘lga olgandi. Bosh prokuraturaning ma’lum qilishicha, yigitni ushlagan ichki ishlar xodimlariga xizmat tekshiruvi o‘tkaziladi.
“O‘zbekiston davlat bayrog‘i rangidagi tasmani taqib yurgan yigit bilan bog‘liq holat yuzasidan ichki ishlar xodimlariga nisbatan xizmat tekshiruvi o‘tkazish bo‘yicha Qamashi tuman prokuraturasi tomonidan taqdimnoma kiritilgan. Hozirda Qashqadaryo viloyati IIB tomonidan xizmat tekshiruvi o‘tkazilmoqda”, — deyiladi xabarda.
Qamashi tumanidagi bozorda O‘zbekiston bayrog‘i rangidagi va “Bitiruvchi” yozuvi bo‘lgan tasma taqqan yigitni qo‘lga olgani aks etgan video tarqalgandi. Bozorda navbatchilik qilayotgan profilaktika inspektorlari tasmali yigitni payqab, uni to‘xtatib, davlat ramzlari to‘g‘risidagi qonunga ko‘ra, uni bu ko‘rinishda taqib yurish unga nisbatan hurmatsizlik hisoblanishini aytgan va tasmani olib tashlashni so‘ragan.
Holat yuzasidan fuqaroga Ma’muriy javobgarlik to‘g‘risidagi kodeksning “tegishli moddalari”ga ko‘ra hujjatlar rasmiylashtirilib, to‘plangan hujjatlar qonuniy to‘xtamga kelish uchun jinoyat ishlari bo‘yicha Qamashi tuman sudiga yuborilgan. Bosh prokuraturaga ko‘ra, yigitga nisbatan maʼmuriy huquqbuzarlik to‘g‘risida ish qo‘zg‘atish haqida qaror qabul qilingan. Idora aralashuvi bilan yigitga nisbatan qo‘llanilgan ushbu noqonuniy qaror bekor qilinishi taʼminlangan.
Mazkur voqeadan keyin “Yuksalish” umummilliy harakati tasmani taqqan yigit ishi bo‘yicha tafsilotlarni ochiqlashga chaqirdi. “Fuqaroga noqonuniy talab qo‘ygan, tegishli hujjatlarni rasmiylashtirgan va javobgarlikka tortish uchun sudga yuborgan IIB xodimlari hamda noqonuniy qaror qabul qilgan sudning harakatlariga qanday baho berilgani masalasi mavhumligicha qolmoqda”, — deyilgandi unda.
Izoh (0)