Bosh prokuratura Qashqadaryoda davlat bayrog‘i rangidagi tasmani taqib yurgan yigitga nisbatan qo‘zg‘atilgan ma’muriy huquqbuzarlik ishini bekor qildi.
Ijtimoiy tarmoqlarda Qamashi tumanidagi bozorda huquq-tartibot idoralari xodimlari O‘zbekiston bayrog‘i rangidagi va “Bitiruvchi” yozuvi bo‘lgan tasma taqqan yigitni qo‘lga olgani aks etgan video tarqaldi. “Kun.uz”ning Qashqadaryo viloyati IIB matbuot xizmatiga tayanib yozishicha, voqea 5-may kuni Qamashi shahridagi “Chim” bozorida sodir bo‘lgan.
Bozorda navbatchilik qilayotgan profilaktika inspektorlari tasmali yigitni payqab, uni to‘xtatib, davlat ramzlari to‘g‘risidagi qonunga ko‘ra, uni bu ko‘rinishda taqib yurish unga nisbatan hurmatsizlik hisoblanishini aytgan va tasmani olib tashlashni so‘ragan.
“Fuqaro IIB xodimlarining qonuniy talablariga bo‘ysunmasdan, qarshilik ko‘rsatgan”, — deyiladi xabarda.
“Natijada belgilangan tartibda Qamashi tumanida yashovchi fuqaro R.I. bilan profilaktik suhbat o‘tkazilgan", — deyiladi viloyat IIB axborot xizmati maʼlumotida. Holat yuzasidan fuqaroga Ma’muriy javobgarlik to‘g‘risidagi kodeksning “tegishli moddalari”ga ko‘ra hujjatlar rasmiylashtirilib, to‘plangan hujjatlar qonuniy to‘xtamga kelish uchun jinoyat ishlari bo‘yicha Qamashi tuman sudiga yuborilgan.
Bosh prokuraturaga ko‘ra, yigitga nisbatan maʼmuriy huquqbuzarlik to‘g‘risida ish qo‘zg‘atish haqida qaror qabul qilingan. Idora aralashuvi bilan yigitga nisbatan qo‘llanilgan ushbu noqonuniy qaror bekor qilinishi taʼminlangan.
2022-yil noyabrda Qonunchilik palatasidagi O‘zLiDeP fraksiyasining kengaytirilgan yig‘ilishida “O‘zbekiston Respublikasining Davlat bayrog‘i to‘g‘risida”gi qonunga tegishli o‘zgartish va qo‘shimchalar kiritish tashabbusini ilgari surib, muhokama tashkil etish va deputatlar orasidan ishchi guruh tuzish ko‘zda tutilgani ma’lum bo‘lgandi. O‘shanda O‘zLiDep lideri Aktam Hayitov bayroq O‘zbekiston suverenitetining ramzi ekanini qayd etib, bayroqning kundalik hayotda doimiy hamrohga aylanishi davlatda yashovchi barcha millat va elat vakillarini jipslashtirishda muhim o‘rin tutishini ta’kidlagan.
Rasul Kusherbayev esa qonun loyihasida davlat bayrog‘idan foydalanishdagi cheklovlarni olib tashlash, fuqarolarning erkin foydalanishi, egalik qilish imkoniyatlarini kengaytirish nazarda tutilayotganini bildirgandi.
Izoh (0)