O‘zbekistonda davlat bayrog‘ini xonadonlarga ilishga ruxsat berilishi mumkin

O‘zbekiston bayrog‘idan foydalanishdagi ayrim cheklovlar bekor qilinishi mumkin. Bu haqda O‘zLiDeP lideri Aktam Hayitov ma’lum qildi.

Uning bildirishicha, 18-noyabr — O‘zbekiston bayrog‘i qabul qilingan kuni Qonunchilik palatasidagi O‘zLiDeP fraksiyasining kengaytirilgan yig‘ilishida “O‘zbekiston Respublikasining Davlat bayrog‘i to‘g‘risida”gi qonunga tegishli o‘zgartish va qo‘shimchalar kiritish tashabbusini ilgari surib, muhokama tashkil etish va deputatlar orasidan ishchi guruhi tuzish ko‘zda tutilmoqda.

Aktam Hayitov bayroq O‘zbekiston suverenitetining ramzi ekanini qayd etib, bayroqning kundalik hayotda doimiy hamrohga aylanishi davlatda yashovchi barcha millat va elat vakillarini jipslashtirishda muhim o‘rin tutishini ta’kidladi.

Uning so‘zlariga ko‘ra, deputatlar saylovchilar bilan o‘tkazgan uchrashuvlarida bayroqdan foydalanishda ayrim cheklovlar mavjudligini ochiq, oshkora aytishmoqda. Davlat bayrog‘i to‘g‘risidagi qonunni davr talabiga moslashtirish, bayroqdan foydalanish borasida qonun normalarini yanada liberallashtirish lozimligi bildirilmoqda.

Deputat Rasul Kusherbayevning aniqlik kiritishicha, qonun loyihasida davlat bayrog‘idan foydalanishdagi cheklovlarni olib tashlash, fuqarolarning erkin foydalanishi, egalik qilish imkoniyatlarini kengaytirish nazarda tutilmoqda.

“Oddiy aytganda, bu o‘zgarishlardan keyin fuqarolar ham bayrog‘imizga hurmat saqlagan holda o‘z xonadonlariga ham ilish, ish joylarida erkin foydalanishi mumkin bo‘ladi. Bu orqali bayroq bo‘yicha mavjud cheklovlar uchun belgilangan jazo masalasini ham qayta ko‘rib chiqishga to‘g‘ri keladi”, — degan deputat.