Қашқадарёда аёл қизини урган юқори синф ўқувчиларини калтаклади

Қашқадарё вилояти Қарши шаҳрида ўқувчи қизлардан бирининг онаси мактабга келиб, жанжал уюштирди. Бу ҳақда вилоят ИИБ ахборот хизмати хабар берди.

Маълум қилинишича, 8 май куни тахминан соат 16:30 ларда Қарши шаҳар 1-сонли мактабнинг 6-синф ўқувчиси вояга етмаган қиз А.Ш. ва шу мактабнинг 8-синф ўқувчиси вояга етмаган қиз Т.Ф. ўртасида келишмовчилик содир бўлган.

Оқибатда вояга етмаган А.Ш.нинг онаси Х.Ш. бир нечта таниши билан мактабга бориб, вояга етмаган Т.Ф. ва бошқа вояга етмаган қизларни ҳақорат қилиб, бир нечтасини уриб, тан жароҳати етказган.

Вилоят Мактабгача ва мактаб таълими бошқармасининг маълум қилишича, қизининг юқори синф ўқувчиси томонидан калтакланганини эшитган аёл бир неча шериги билан мактабга бостириб келган. Мактаб директори ўринбосари қизлар ёнига бориб, уларни тажовуз қилаётган онадан ажратаётган вақтида у билан бирга келган аёллар ҳам жанжалга қўшилган.

Мазкур ҳолат юзасидан Қарши шаҳар ИИО ФМБ ҳузуридаги Тергов бўлими томонидан Жиноят кодексининг 277-моддаси (безорилик) 1-қисми билан жиноят иши қўзғатилиб, тергов ҳаракатлари олиб борилмоқда.

Ўқитувчиларнинг калтакланиш ҳолатлари

Сурхондарё вилояти Сариосиё туманида мактаб директори бир неча шахслар томонидан калтаклангани айтилган эди. Шунингдек, вилоятнинг Сариосиё тумани халқ таълим бўлими мудири ҳудуддаги мактаблардан бирининг директорини ҳақорат қилган эди. Бир неча кун олдин эса Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди. 10 май куни Тошкент шаҳридаги мактабларнинг бирида ўқитувчи аёл ўқувчи қизнинг онаси томонидан калтаклангани юзасидан жиноят иши қўзғатилди.