Toshkent shahar Mirzo Ulug‘bek tumanida nabira buvisini kaltaklab, uning o‘limiga sababchi bo‘ldi. Bu haqda “Millar” ko‘rsatuvida ma’lum qilindi.
Ish hujjatlariga ko‘ra, nabira voqea sodir bo‘lgan kunda spirtli ichimlik ichgan va mast holatda buvisinikiga borgan. Shundan keyin 91 yoshli buvi hamda nabira o‘rtasida kelishmovchilik yuzaga kelgan. Natijada u ayol tanasining bir qancha joyiga urib, og‘ir tan jarohati yetkazgan.
“Aroq ichib, buvimnikiga bordim. U doimgidek noroziliklarini bildirdi, haqorat qildi. Bu faqat o‘sha kundagi holat emas, balki 10 yildan beri takrorlanayotgan jarayon edi. Buvim keksa bo‘lgani bois ancha injiq va atrofdagilarga nisbatan norozi kayfiyatda bo‘lib qolgandi, ataylab janjal chiqarishga urinardi”, — deydi nabira.
Sudlanuvchining so‘zlariga ko‘ra, u buvisinikiga uy telefonini ulab berish uchun borgan, ayolni o‘ldirib qo‘ygach esa avval onasiga, so‘ng “102”ga qo‘ng‘iroq qilgan.
Jinoyat ishlari bo‘yicha Mirzo Ulug‘bek tuman sudida ko‘rib chiqilgan ishda sudlanuvchi Jinoyat kodeksining 97-modda (qasddan odam o‘ldirish) 2-qismi bilan aybdor deb topildi. Unga nisbatan 15 yil muddatga ozodlikdan mahrum qilish jazosi tayinlandi.
Mart oxirlarida Toshkent shahar Mirobod tumanida o‘z buvisini urib o‘ldirgan yigit 8 yilga qamalgandi. Voqea sodir bo‘lgan kuni sudlanuvchi yigit mast holatda bo‘lgan. Spirtli ichimlik taʼsirida buvisi bilan janjallashgan. Oqibatda sudlanuvchi buvisining turli qismlariga tan jarohati yetkazgan. Tez yordam kelgach jabrlanuvchida biologik o‘lim holatini qayd etgan.
Izoh (0)